Ֆրիմանի թոռնուհու սպանության մեջ մեղադրվում է նրա ընկերը

ԵՐԵՎԱՆ, 17 օգոստոսի — Sputnik. ԱՄՆ իշխանությունները մեղադրանք են ներկայացրել երիտասարդին, ում կասկածում են ամերիկացի դերասան Մորգան Ֆրիմանի թոռնուհու սպանության մեջ։

Դեպքը տեղի է ունեցել կիրակի գիշերը։ Ոստիկանության տվյալով` Նյու Յորքի փողոցներից մեկում անհայտ անձը 33–ամյա Իդինա Հայնսին դանակով հարվածներ է հասցրել։ Աղջիկը տեղափոխվել է հիվանդանոց, որտեղ մահացել է։ Ականատեսների վկայությամբ` Դևենփորթն իր ընկերուհուն դանակի մահացու հարվածներ է հասցրել և շարունակել էր հարվածել, մինչև ոստիկանները նրան ձերբակալել են։ Վկաները հայտնում են նաև, որ մարդասպանն իրեն էկզորցիստ է համարել, ով փորձում էր զոհի միջից քշել դևին։

Ձերբակալությունից հետո Դևենփորթը, ով հայտնի է ռեփ ոճի կատարումներով, հիվանդանոց է տեղափոխվել դատաբժշկական փորձաքննություն անցկացնելու համար։ Երկուշաբթի նրան երկրորդ աստիճանի սպանության մեղադրանք է ներկայացվել, հայտնում է Ասոշիեյթեդ Փրեսը։

Նյու Յորքում Հայնսը, ով Ֆրիմանի առաջին կնոջ թոռնուհին է, դերասանական վարպետություն էր սովորում, աշխատում էր որպես դերասանուհի և գրող։ Դերասանը խորն ափսոսանք է հայտնել նրա մահվան կապակցությամբ` նշելով, որ «աշխարհն այլևս չի իմանա նրա արտիստիզմի և տաղանդի մասին»։ Ֆրիմանը և Հայնսը հաճախ էին հայտնվում միասին, և դերասանը նույնիսկ ստիպված էր հերքել իրենց հնարավոր նշանադրության մասին լուրերը։