Երևանի «Էրեբունի» բժշկական կենտրոնում եռյակ է ծնվել

ԵՐԵՎԱՆ, 17 օգոստոսի – Sputnik. «Էրեբունի» բժշկական կենտրոնում օգոստոսի 8-ին եռյակ է ծնվել, հայտնում է aravot.am–ը: Նորածինների մայրը՝ 38 ամյա Անի Բադալյանն արդեն մեկ դուստր ուներ, բայց ամուսնու հետ որոշել էր դիմել արհեստական բեղմնավորման՝ «Էկո»-ի:

Նա ասաց, որ բնական ճանապարհով էլ կարող էր հղիանալ, սակայն ամուսնու հետ շատ էին ցանկանում միանգամից շատ երեխա ունենալ և անգամ ֆինանսական մեծ ծախսերը հետ չեն պահել ամուսիններին` դիմելու արհեստական բեղմնավորմանը։

«Որոշեցինք «Էկո» անել, որովհետև հավանականությունը մի քանի բալիկի ծննդի ավելի շատ է: Ճիշտ է, հնարավոր է մեկ երեխա ծնվեր, բայց մենք ռիսկի գնացինք մեր բժշկուհու հետ և երեք էմբրիոն տեղադրեցինք, և Աստծո հաջողությամբ երեքն էլ դարձան բալիկ: 2 էմբրիոն էլ ունենք, 2-3 տարուց կգնանք նրանց հետևից», — ասաց Անի Բադալյանը:

Երեխաների անուններն են`Էլինա, Մարտին և Նարեկը, և Անին արդեն երեքի բնավորությունները նկատել է։

«Աղջիկս արդեն աղջկական կապրիզներ է ցույց տալիս, իրեն բոլորից շատ եմ գրկում, փոքրը՝ Նարեկը, շատ խորամանկ ու ճարպիկն է, ինքն ամենաուշն է «կյուվեզից» դուրս եկել, բայց ամենաարագն է մեծանում: Մարտինն էլ խելոք է, անունը պապիկի պատվին ենք դրել, ժողովրդական նկարիչ է, հույս ունենք` պապիկի տաղանդը կունենա», – ասել է մայրը:

Անին ցանկանում էր, որ երեքն էլ աղջիկ ծնվեին, սկզբում բժիշկներն ասել էին՝ երեքն էլ տղա է, բայց քանի որ հղիությունը շատ ցանկալի ու սպասված էր ու շատ բարդ, ինչպես Անին ասաց՝ սեռը կարևոր չէր, միայն թե առողջ երեխաներ լինեին:

«Երեխաների առողջական վիճակը լավ է», — վստահեցրեց «Էրեբունի» բժշկական կենտրոնի մանկաբարձ-գինեկոլոգ Տիգրան Հովհաննիսյանը: Բժշկի ներկայացմամբ՝ Անի Բադալյանի 2-րդ հղիությունն էր և 2-րդ ծննդաբերությունը։

«Առաջինը եղել է ինքնուրույն, իսկ սա արտամարմնային հղիություն էր: Անին ի սկզբանե գտնվել է «Էրեբունու» բժիշկների հսկողության տակ, վերջին 40 օրը գտնվել է հղիների բարձր ռիսկի բաժանմունքում, քանի որ բավականին լուրջ հղիություն էր, և այն պետք է վարվեր ստացիոնար բաժանմունքում»: