Առողջապահության նախարարություն. ՃՏՊ–ում տուժած երեխաների կյանքին վտանգ չի սպառնում

ԵՐԵՎԱՆ, 17 օգոստոսի – Sputnik. Սևան–Լճաշեն ավտոճանապարհին գրանցված ՃՏՊ–ում տուժած երեխաների կյանքին վտանգ չի սպառնում, հայտնում է Հայաստանի առողջապահության նախարարության մամուլի ծառայությունը։

19  ուղևորներով, որոնց մեծ մասը երեխաներ էին, ավտոբուսը ժամը 11։00–ի սահմաններում դուրս է եկել երթևեկելի մասից և կողաշրջվել Սևան–Լճաշեն ավտոճանապարհին։ ՀՀ առողջապահության նախարարի հանձնարարությամբ դեպքի վայր են մեկնել Հրազդանի և Սևանի բուժկենտրոնի «Շտապօգնության» բրիգատներ, ինչպես նաև նեղ մասնագետների խմբեր։

57–ամյա վարորդին ցուցաբերվել է առաջին բուժօգնություն, ինը մարդ տարբեր աստիճանի վնասվածքներով տեղափոխվել են Սևանի հիվանդանոց։

Ժամը 14:00-ի դրությամբ` մարմնական տարբեր վնասվածքներով Սևանի հիվանդանոց տեղափոխված 10 տուժածն անցել են անհրաժեշտ հետազոտություններ: Բոլորի վիճակը գնահատվում է բավարար:

Տեղի և մարզի մասնագետների մասնակցությամբ կազմակերպված բժշկական կոնսիլիումի ընթացքում որոշում է կայացվել չորս հիվանդի տեղափոխել Երևան` մեկին «Սուրբ Աստվածամայր», երեքին «Սուրբ Գրիգոր Լուսավորիչ» բժշկական կենտրոններ` լրացուցիչ հետազոտություններ իրականացնելու նպատակով:

Դեպքի մանրամասները պարզվում են։