Գտել են Ինդոնեզիայում վթարի ենթարկված ինքնաթիռի բեկորները

ԵՐԵՎԱՆ, 17 օգոստոսի– Sputnik. Փրկարարները գտել են Trigana Air Service ավիաընկերության ATR 42-300 մարդատար ինքնաթիռի բեկորներն Ինդոնեզիայի Օքսիբիլ քաղաքից 12 կմ հեռավորության վրա, ուր ուղևորվում էր ինքնաթիռը, հաղորդում է Associated Press-ը` հղում անելով տեղի իշխանություններին։

Trigana Air Service ավիաընկերության ինքնաթիռը 54 ուղևորներով կիրակի անհետացել էր Ինդոնեզիայի արևելքում։ Նախնական տվյալներով` ինքնաթիռն ընկել է Ինդոնեզիայի Օքսիբիլ քաղաքի արվարձանում վայրէջքից 10 րոպե առաջ։ Ավելի վաղ Ինդոնեզիայի տրանսպորտի նախարարության ներկայացուցիչը հաղորդել է, որ տեղի բնակիչները հայտնաբերել են ինքնաթիռի բեկորները Պապուա նահանգի շրջանում։

Ինքնաթիռի բեկորները հաջողվել է նկատել օդանավից, որը մասնակցում է որոնողափրկարարական գործողությանը, որը սկսվել է երկուշաբթի առավոտյան։ Նախօրեին օդից որոնումներ չեն իրականացվել մթության պատճառով։

«Օդային որոնում անցկացնելու պահին Twin Otter ինքնաթիռը ծուխ է տեսել և բեկորներ Օքսիբիլի օդանավակայանից 7 ծովային մղոն հեռավորության վրա»,– մեջբերում է Ինդոնեզիայի որոնողափրկարարական վարչության (Basarnas)  ղեկավարին Հենրի Բամբանգա Սուլիստյուին  Detik.com լրատվական կայքը։

Basarnas–ի տվյալներով` ինքնաթիռում գտնվող մարդիկ եղել են Ինդոնեզիայի քաղաքացիներ։

«Մենք տեղեկատվություն ենք ստացել տեղի բնակիչներից, որ ինքնաթիռը բախվել է լեռանը Օկբապեի շրջանում»,– ավելի ուշ հայտարարել է Ինդոնեզիայի տրանսպորտի նախարարության քաղաքացիական ավիացիայի վարչության տնօրեն Պրասետյոն (Prasetyo)։

Ինչպես ՌԻԱ Նովոստիին հեռախոսով հաղորդել է աղբյուրը, որն աշխատում է ինդոնեզիական Պապուա արևելյան նահանգի ավիաընկերություններից մեկում, ATR ինքնաթիռը վթարի է ենթարկվել կիրակի նահանգում լեռան հետ բախվելու հետևանքով, բոլոր ուղևորները մահացել են։ Ինդոնեզիայում ՌԴ դեսպանատան մամուլի քարտուղար Իդայաթ Նասիբովը հաղորդել է գործակալությանը, որ նախնական տվյալներով` ինքնաթիռում Ռուսաստանի քաղաքացիներ չեն եղել։

Որոնողափրկարարական գործողությունը շարունակվում է։