Հայաստանը պատրաստ է աջակցել Չինաստանին` Տյանցզինի ԱՊ–ի հետ կապված

ԵՐԵՎԱՆ, 14 օգոստոսի – Sputnik. Հայկական կողմն անհրաժեշտության դեպքում պատրաստ է քննարկել Չինաստանին Տյանցզինի պայթյունի հետ կապված աջակցություն ցուցաբերելու հնարավորությունը, ասել է ՀՀ տարածքային կառավարման և արտակարգ իրավիճակների նախարարության հասարակայնության հետ կապերի վարչության պետ Ֆաինա Վարդանյանը։

Չորեքշաբթի Տյանցզին արդյունաբերական նավահանգստային քաղաքում` Ruihai Logistics լոգիստիկ ընկերության պահեստում, որտեղ պահվել են վտանգավոր նյութեր, երկու պայթյուն է գրանցվել։ Ներկա պահին Տյանցզինի պայթյունի զոհերի թիվը հասել է 56–ի, այդ թվում 21 հրշեջներ։ Եվս 721 մարդ հոսպիտալացվել է, 25-ը գտվում են ծայրահեղ ծանր վիճակում, ևս 33–ի վիճակը գնահատվում է` ծանր։

«Միջազգային օգնությունը ցուցաբերում են հետևյալ կերպ` սկզբում երկիրը, որտեղ տեղի է ունեցել պայթյունը, եթե անհրաժեշտություն կա պետք է դիմի օգնության խնդրանքով»։ Եթե մենք այդպիսի հարցում ստանանք, ապա այն կքննարկվի պետական մակարդակով», – ասել է Վարդանյանը։

Նա հիշեցրել է, որ Հայաստանը մի քանի տարի առաջ աջակցություն է ցուցաբերել Իրանին երկրաշարժից հետո` այնտեղ փրկարարներ ուղարկելով, իսկ Թուրքիա ուղարկվել է հումանիտար օգնություն։ «Մենք պատրաստված մասնագետներ ունենք, փրկարարներ և սարքավորումներ», – նշել է Վարդանյանը։

Տյանցզինի պայթյուններն այնքան հզոր էին, որ դրանք գրանցել է տեղական սեյսմիկ ծառայությունը։ Հզորությունը կազմել է 3 և 21 տոննա տրոտիլային համարժեքով։