Արարատ լեռան գագաթին ծածանվել է հարյուրմետրանոց եռագույնը

ԵՐԵՎԱՆ, 14 օգոստոսի–Sputnik. 35 հոգուց բաղկացած խումբը բարձրացել է Արարատ լեռան գագաթը «Ջահերով երթ դեպի Արարատ լեռան գագաթը» նախագծի շրջանակում, որպեսզի այնտեղ տեղադրի Հայաստանի հարյուրմետրանոց դրոշը, ուրբաթ լրագրողներին ասաց նախագծի նախաձեռնող, «Կարին» հայտնի համույթի պարող Հովհաննես Մարտիրոսյանը։ 

Արարատ լեռը Հայկական լեռնաշղթայի ամենաբարձր հրաբխային զանգվածն է, որը գտնվում է ժամանակակից Թուրքիայի արևելքում։ Չնայած դրան, Արարատը հայ ժողովրդի խորհրդանիշն է, այն պատկերված է նաև Հայաստանի Հանրապետության զինանշանի վրա։

Մարտիրոսյանի խոսքով` վերելքը տեղի է ունեցել հուլիսի 26–ից օգոստոսի 1–ն ընկած ժամանակահատվածում և նվիրվել է Հայոց ցեղասպանության 100–րդ տարելիցին, Սարդարապատի ճակատամարտին (1918 թ.) և Մուսա լեռան ստորոտին հայերի հերոսական ինքնապաշտպանությանը

Արշավախմբի մասնակիցները ութ րոպե տևողությամբ ֆիլմ են նկարահանել այն մասին, թե ինչպես են բարձրացել լեռան գագաթը, պարել հայկական ազգային պարեր (քոչարի, յարխուշտա) և երգել ազգային երգեր հայկական լեռան գագաթին։

«Առաջին անգամը չէ, որ բարձրանում ենք Արարատի գագաթը։ Մեզ մոտ նման գաղափար էր ծագել դեռևս նախորդ տարի։ Եղանակը հիանալի էր, այդ պատճառով, չնայած քաղաքական խնդիրներին, մեզ հաջողվեց հանգիստ բարձրանալ լեռան գագաթը», – ասաց Մարտիրոսյանը։

Նա նշեց, որ քիչ էր մնում թուրքերի և քրդերի լարված հարաբերությունները ձախողեին վերելքը, սակայն ամեն ինչ հանդարտվեց։

«Կարին» ազգագրական համույթի ղեկավար Գագիկ Գինոսյանը, ով ես մասնակցել է վերելքին, նշեց, որ արշավի ընթացքում նկարահանված ֆիլմն արտահայտում է ոչ միայն համույթի պարողների, այլ նաև ողջ հայ ժողովրդի ոգին և էներգիան։

«Մենք պատրաստվում ենք մասնագիտական նկարահանումներ սկսել Արարատի վրա։ Աշնանը համույթը հանդիսատեսի դատին կհանձնի մի ֆիլմ, որն ավելի մանրամասն է պատմում վերելքի մասին», – ավելացրեց Գինոսյանը։

Նրա խոսքով` խանդավառությունը, էներգիան և լավ տրամադրությունն օգնեցին վերելքի մասնակիցներին հաղթահարել ճանապարհին առաջացած բոլոր խնդիրները։

Թուրքիա կատարած այցի ընթացքում արշավախմբի մասնակիցներն այցելել են նաև Արևմտյան Հայաստանում գտնվող Կարս, Անի և Վան քաղաքները։