ԶԼՄ. ոսկու շուկաներում աղետալի վիճակ է, սեղանիկներն ամեն օր դատարկվում են

ԵՐԵՎԱՆ, 14 օգոստոսի– Sputnik. «Բաղնիքի» և ոսկու մյուս շուկաներում «կատաստրոֆիկ» վիճակ է, փաստում են ոսկեգործությամբ զբաղվողները: Ամեն օր փակվում են նոր ԱՁ-ներ, ու շուկայում սեղանիկները մնում են դատարկ, գրում է «Ժամանակ» օրաթերթը:

Ոսկու շուկայի աշխատակիցներից մեկը նշել է, որ առևտուրը համարյա 90 տոկոսով նվազել է, կուտակած ապրանքները վաճառում են ինքնարժեքով, ինքնարժեքից ցածր, որպեսզի կարողանան վճարել հարկերն ու վարձավճարները:

Աշխատակիցներից մեկը նշել է, թե հույս ունեին, որ գոնե շուկայի սեփականատերերը մի քիչ կիջեցնեին վարձավճարները, բայց անօգուտ: Ոչ ոք ոչ մի զիջման չգնաց, և այս վիճակով այլևս հնարավոր չէ աշխատել:

Նա նշել է, որ առաջիկայում ավելի վատ է լինելու, որովհետև այս երկու ամսվա մեջ գոնե չնչին առևտուր էր լինում, քանի որ սփյուռքահայեր, զբոսաշրջիկներ շատ կան քաղաքում, բայց սեպտեմբերից իսկական «կատաստրոֆիկ» վիճակ է լինելու։

«Բոլորը դրանում կհամոզվեն և նույնպես կսկսեն փակել իրենց կետերը։ Չէր կարելի մի գործունեության վրա 10 տեսակի հարկ դնել, ոսկու գինը բարձրացնել և ակնկալել, որ այդ վիճակում առևտուր կլիներ»,– ասել է թերթի զրուցակիցը։

Նույն վիճակն է նաև Մալաթիայի ոսկու շուկայում։ Խմբագրություն զանգահարած աշխատակիցը հորդորել է գնալ և նկարահանել դատարկ սեղանները։ «Ապշելու բան է, ամեն օր 2-3 հոգի իրենց իրերը հավաքում են, գնում»,– ասել է աշխատակիցը։