Պան Գի Մուն. խաղաղապահների հանցագործությունները ՄԱԿ-ի համար չարորակ ուռուցք են դարձել

ԵՐԵՎԱՆ, 14 օգոստոսի– Sputnik. ՄԱԿ–ի գլխավոր քարտուղարը պնդում է, որ ՄԱԿ–ի խաղաղապահների իրականացրած սեռական բռնությունների և լիազորությունների չարաշահման համար պետք է պատասխանատվություն կրեն կազմակերպության առաքելության ներկայացուցիչները։ «Երկնագույն բերետավորների» կարգապահության հարցը պետք է ներառվի ՄԱԿ–ի Անվտանգության խորհրդի օրակարգում, հայտարարել է Պան Գի Մունը։

Հինգշաբթի ՄԱԿ–ի ԱԽ–ն փակ նիստ է անցկացրել ՄԱԿ–ի խաղաղապահների հասցեին ուղղված բռնաբարությունների մասին նոր մեղադրանքներից հետո։ «Խաղաղապահների հանցագործությունները մեր համակարգի համար չարորակ ուռուցք են դարձել։ Ես ենթադրում եմ, որ սեռական շահագործումը, անպատվությունը և լիազորությունների այլ չարաշահումները կներառվեն ԱԽ–ի հանդիպումների օրակարգում և կքննարկվեն այն երկրների հետ, որոնք խաղաղապահ համակազմեր են տրամադրում»,– ասել է Պան Գի Մունը։

Նա հայտարարել է, որ ՄԱԿ–ի համակարգը միջադեպերի շատերը չի արձանագրում, և մեղավորներն անպատիժ են մնում։ «Չափազանց շատ միջադեպերի մասին չի հաղորդվում։ Չափազանց քիչ դեպքեր են հետաքննվում, և արդարադատությունն անտեսվում է»,– ասել է նա։

Amnesty International  միջազգային իրավապաշտպան կազմակերպությունն այս շաբաթ հայտարարել էր, որ Կենտրոնական Աֆրիկայի Հանրապետությունում բռնաբարության հերթական դեպքն է գրանցվելի։ Կազմակերպության տեղեկատվության համաձայն, ՄԱԿ խաղաղապահները 12–ամյա աղջկա են բռնաբարել, մասնակցել են 16–ամյա տղայի բռնաբարությանն ու նրա հոր սպանությանը։ Amnesty–ի փորձագետների տվյալներով` դեպքերը տեղի են ունեցել օգոստոսի 2–ին և 3–ին, երբ ԿԱՀ–ում ՄԱԿ–ի առաքելության ուժերը գործողություն էին իրականացնում ԿԱՀ–ի մայրաքաղաքում։