Ճապոնիայում մեկ օրվա ընթացքում երկրորդ երկրաշարժն է գրանցվել

ԵՐԵՎԱՆ, 14 օգոստոսի — Sputnik. Ուրբաթ Ճապոնիայի արևելքում օրվա ընթացքում երկրորդ ուժգին երկրաշարժն է գրանցվել։ Երկրաշարժի ուժգնությունը Ռիխտերի սանդղակով կազմել է 5.1 մագնիտուդ, հայտնել է Ճապոնիայի օդերևութաբանական ծառայությունը։

Ծառայության տվյալով` էպիկենտրոնը Հոքայդո կղզու Տոկատի շրջանում է, օջախը` 80 կիլոմետր խորության վրա։

Նույն օրվա արևածագին 5.0 մագնիտուդով ևս մեկ երկրաշարժ է գրանցվել Ֆուկուսիմայի Հոնսյու կղզում, որտեղ չորս տարի առաջ վթար էր գրանցվել ատոմային էլեկտրակայանում։ Ստորգետնյա ցնցումներ են գրանցվել նաև Տոկիոյում։

Երկրաշարժի պատճառած վնասի մասին տվյալներ չկան, ցունամիի սպառնալիք չի հայտարարվել։

Ճապոնիան սեյսմիկ բարձր ակտիվության գոտում է։ Կոբա քաղաքում 1995 թվականին գրանցված 7.2 մագնիտուդով երկրաշարժի հետևանքով ավելի քան 6 հազար մարդ էր զոհվել։

2011 թվականին Ֆուկուսիմայի երկրաշարժից հետո 15–մետրանոց բարձրության հսկա ալիքը ծածկել էր «Ֆուկուսիմա-1» ԱԷԿ–ը և Չեռնոբիլից հետո խոշորագույն ատոմային վթարի պատճառ դարձել։ Ավերածություններից և ցունամիից հետո զոհվել և անհետ կորել էր շուրջ 20 հազար մարդ։