Թուրքիայում կոալիցիոն կառավարություն ստեղծելու մասին պայմանավորվածություն առայժմ չկա

ԵՐԵՎԱՆ, 13 օգոստոսի– Sputnik. Թուրքիայի իշխող «Արդարություն և զարգացում» կուսակցությունն ու հիմնական ընդդիմադիր Ժողովրդահանրապետական կուսակցությանը չեն կարողացել պայմանավորվածության հասնել կոալիցիոն կառավարություն ստեղծելու հարցում, հաղորդում է Ռոյթերս գործակալությունը` հղում անելով ԺՀԿ ներկայացուցչին։

«Բանակցությունների ելքը բացասական է»,– գործակալությանը հաղորդել է ընդդիմության աղբյուրը` մանրամասներ չներկայացնելով երկրի վարչապետ Ահմեդ Դավութօղլուի և ԺՀԿ առաջնորդ Քեմալ Քիլիչդարօղլուի բանակցություններից։

Թուրքիայում իշխող «Արդարություն և զարգացում» կուսակցությունը հաղթել է հունիսի 7–ին ընտրություններում, բայց 2002թ.–ից ի վեր առաջին անգամ կորցրել է խորհրդարանական մեծամասնությունը և չի կարող միայնակ կառավարություն ձևավորել։

Թուրքիայի նախագահ Թայիփ Էրդողանը հուլիսի 9–ին հանձնարարել է ԱԶԿ առաջնորդին` գործող վարչապետ Ահմեդ Դավութօղլուին, կառավարություն ձևավորել։ Թուրք վարչապետը կոալիցիոն բանակցություններ է անցկացնում երեք այլ խորհրդարանական կուսակցությունների առաջնորդների հետ։ Եթե 45 օրերի ընթացքում չհաջողվի կառավարություն ձևավորել, նախագահը կլուծարի խորհրդարանը և կնշանակի արտահերթ ընտրություններ։

Դավութօղլուի և Քիլիչդարօղլուի միջև բանակցությունների առաջին փուլն ավարտվել է երկուշաբթի առանց վերջնական որոշում ընդունելու։