Հայ կանայք ավելի ակտիվ են աշխատանք փնտրում, քան տղամարդիկ

ԵՐԵՎԱՆ, 13 օգոստոսի– Sputnik. Զբաղվածության պետական գործակալությունում գրանցված գործազուրկների մեծամասնությունը կանայք են: Նրանց թիվը գործազուրկների ընդհանուր թվաքանակում 70.4 տոկոս է: Ինչպես «Sputnik-Արմենիա» ռադիոկայանի հետ զրույցում ասել է  «Զբաղվածության պետական ծառայություն»  գործակալության պետ Արտակ Մանգասարյանը, թվի մեծությունը պայմանավորված է այն հանգամանքով, որ կանայք՝ որպես աշխատանք փնտրողներ, ավելի ակտիվ են, և նրանք ավելի հաճախ են աշխատանք փնտրում հենց գործակալության միջոցով: 

«Գործազուրկ կանանց թվաքանակի մեծությունը կախված է նրանից, որ կանայք ավելի դժվար են աշխատանք գտնում աշխատաշուկայում, որովհետև դժվարությամբ են համաձայնում այն աշխատաժամերին, աշխատավարձերին և պայմաններին, որոնց համաձայնում են տղամարդիկ: Հիմնական պատճառները դրանք են: Պետք է հաշվի առնել նաև այն, որ կանայք ունեն երեխաների խնամքի և նմանատիպ այլ խնդիրներ»,- ասել է Մանգասարյանը:

Վիճակագրության համաձայն, գործազուրկների 24.2 տոկոսը կազմում են երիտասարդները: Բանախոսը սա բացատրում է անփորձությամբ: «Գործատուները հիմնականում նախընտրում են ավելի փորձառու աշխատողներ ներգրավել աշխատանքում»,-նշել է նա:

Արտակ Մանգասարյանն ընդգծում է, որ իր ղեկավարած գործակալությունն իրականացնում է տարաբնույթ ծրագրեր՝ կանանց ներգրավվման համար: «Նրանք կարող են ընդգրկվել մեր բոլոր ծրագրերում, այդ թվում՝ փոքր ձեռնարկատիրական աջակցության ծրագրում: Սա դրամաշնորհային ծրագիր է, որով 1 միլիոն դրամի համաֆինանսավորում ենք անում՝ համապատասխան բիզնես ծրագիր ներկայացնելու դեպքում: Աշխատավարձի մասնակի փոխհատուցման դեպքում, եթե տվյալ անձը մրցունակ է, կազմակերպում ենք մասնագիտական ուսուցում և վերամասնագիտացում: Տարին մեկ անգամ կազմակերպում ենք աշխատանքի տոնավաճառ: Կարող են ընդգրկվել նաև գյուղացիական տնտեսության աջակցման ծրագրում, որը սեզոնային զբաղվածության ծրագիր է»,- թվարկել է բանախոսը:

Երիտասարդների համար ևս կան ծրագրեր: Մանգասարյանը նշում է, որ մասնագիտություն ունեցող, բայց աշխատանքային փորձ չունեցող երիտասարդների համար, որոնք հինգ տարուց ավելի ավարտել են բուհը և չեն աշխատել մասնագիտությամբ, կա հատուկ ծրագիր, որի միջոցով նրանք տեղավորվում են աշխատանքի, վճարվում են նվազագույն աշխատավարձի չափով: «Վճարում ենք նրանց սոցվճարները, որոշակի պրակտիկայի համար գումար ենք վճարում կազմակերպությանը, որտեղ նրանք երեք ամիս պրակտիկա են անցնում և փորձ ձեռք բերում: Դրանք ծավալուն ծրագրեր են, որոնցում բավական շատ մարդ է ընդգրկվում: Այդ պրակտիկայից հետո աշխատանքի տեղավորվելը բավական հեշտ է լինում, մոտ 60  տոկոսը մնում է տվյալ գործատուի մոտ աշխատանքի»,- հավաստիացրել է «Զբաղվածության պետական ծառայություն»  գործակալության պետը: