Ասանժին այլևս չեն կասկածում

ԵՐԵՎԱՆ, 13 օգոստոսի– Sputnik. Շվեդիայի դատախազությունը հաղորդել է, որ WikiLeaks–ի խմբագիր Ջուլիան Ասանժին այլևս չեն կասկածում չորս  հանցագործություններից երկուսի մեջ, քանի որ լրացել է գործի վաղեմության ժամկետը։

«Դատախազ Մարիանա Նյուն այսօր դադարեցրել է Ջուլիան Ասանժի գործի քննությունը, որը վերաբերում է սեռական ոտնձգության և անօրինական հարկադրման մեջ կասկածներին։ Դրա պատճառը դարձել է օգոստոսի 13–ին հանցագործության վաղեմության ժամկետը լրանալը»,– ասվում է մամուլի համար հաղորդագրությունում։

2010թ.–ին Ասանժի դեմ բողոքած կանանցից մեկն այդ տեղեկությունն ընդունել է խառը զգացմունքներով։ «Իհարկե, նա կցանկանար, որպեսզի Ասանժը կանգներ դատարանի առաջ։ Բայց 5 տարի է անցել, նա ապրում է սովորական կյանքով»,– ասել է կնոջ փաստաբան Կլաս Բորգստրյոմը «Ռադիո Շվեդիային» տված հարցազրույցում։

Ավելի վաղ Շվեդիայի դատախազությունից ՌԻԱ Նովոստիին հայտնել էին, որ օգոստոսի 18–ին լրանում է ևս մեկ հանցագործության վաղեմության ժամկետը, որը վերաբերում է սեռական ոտնձգությանը։

Մինչև 2020թ.–ն Ասանժին կասկածելու են ևս մեկ կետով, և դա վերաբերում է ավելի քիչ ծանրացուցիչ հանգամանքներով բռնաբարությանը։

Շվեդիայում Ջուլիան Ասանժի անունը լայնորեն հայտնի դարձավ այն ժամանակ, երբ 2010թ.–ի ամռանը քննություն սկսվեց 25 և 35 տարեկան երկու կանանց հայտարարությունների հիման վրա։ Նրանք ոստիկանությանը հայտնել էին, որ տուժել են Ջուլիան Ասանժի սեռական ոտնձգություններից։ Ասանժը նույն տարվա օգոստոսին գտնվում էր Շվեդիայում` համաժողովի մասնակցելու և դասախոսություններ ընթերցելու համար։

Կասկածյալին ձերբակալել են Լոնդոնում 2010թ.–ի դեկտեմբերին շվեդական իրավապահ մարմինների հարցումով, որոնք պահանջել են հանձնել Ասանժին բռնաբարության մասին գործով։ 2012թ.–ի մայիսի 30–ին Մեծ Բրիտանիայի Գերագույն դատարանը գործի նյութերի հետ ծանոթանալուց հետո հաղորդել է, որ Ասանժին շվեդական իշխանություններին հանձնելու համար արգելքներ չկան։ Դատարանը հաստատել է իր որոշումը նույն տարվա հունիսի 14–ին։ Ասանժն այդ ընթացքում հերքել է սեռական բնույթի հանցագործությունների կատարման մեջ ինչ–որ մասնակցություն ունենալու մեղադրանքը։

2012թ.–ի հունիսի 19–ին հայտնի է դարձել, որ Ասանժը գնացել է Լոնդոնում Էկվադորի դեսպանատուն և դիմել էկվադորյան իշխանություններին` խնդրելով իրեն քաղաքական ապաստան տրամադրել` շվեդական իշխանությունների կողմից նրան ԱՄՆ–ին հանձնելու մտավախության պատճառով։ Հայտարարությունը ներկայացնելու պահից Ասանժը գտնվում  է Էկվադորի դեսպանատանը։

Շվեդ քննիչներն առայժմ չեն կարողացել հարցաքննել Ասանժին, քանի որ համապատասխան թույլտվություն չեն ստացել Էկվադորի իշխանություններից։