Մարզահամերգային համալիրը վաճառվել է, նոր սեփականատերը 100 միլիոն դոլարի ներդրում կկատարի

ԵՐԵՎԱՆ, 13 օգոստոսի – Sputnik. ՀՀ կառավարության այսօրվա նիստում որոշում է կայացվել Պաշտպանության նախարարությանն հաշվեկշռում գտնվող և Հայաստանի Հանրապետության սեփականությունը հանդիսացող «Կարեն Դեմիրճյանի անվան մարզահամերգային համալիր» պետական ոչ առևտրային կազմակերպությունը վաճառքի ձևով օտարել «NTA INVESTMENT GROUP»  ՍՊԸ–ին: Օտարման ենթակա անշարժ գույքի վաճառքի գինը 30 մլն դոլար է, ասվում է Հայաստանի կառավարության պաշտոնական կայքում։

Կարեն Դեմիրճյանի անվան մարզահամերգային համալիրի նոր սեփականատերը` «NTA INVESTMENT GROUP» ընկերությունը, պարտավորվում է 100 միլիոն դոլարի ներդրում կատարել, կառավարության նիստում ասել է Հայաստանի պաշտպանության նախարար Սեյրան Օհանյանը։

Կարեն Դեմիրճյանի անվան մարզահամերգային համալիրը Երևանում կառուցվել է 1983 թվականին։ Բացումից մեկուկես տարի անց համալիրում բռնկված ուժեղ հրդեհից հետո ՄՀՀ–ն փակվել է ընդհուպ մինչև վերակառուցում 1987 թվականի վերջին։ 1999 թվականին, հայկական խորհրդարանում տեղի ունեցած ահաբեկչությունից հետո, որի ժամանակ զոհվեց Ազգային ժողովի նախագահ Կարեն Դեմիրճյանը, համալիրը կոչվեց նրա անունով։

2005 թվականի հոկտեմբերի 9–ին համալիրը 5.7 մլն դոլարով վաճառվել է ռուսական ԲԱՄՕ հոլդինգին, որը պարտավորվել է այն վերակառուցել։ Նոր վերակառուցումը տևել է գրեթե 3 տարի, իսկ արժեքը կազմել է մոտ 42 մլն դոլար։

Համալիրի շենքը ուշ խորհրդային շրջանի ճարտարապետության գլուխգործոցներից է։

Օհանյանի խոսքով` նոր գնորդը պարտավորվել է համալիրի 99 աշխատողների հետ աշխատանքային պայմանագիր ստորագրել։ Ակնկալվում է, որ ՄՀՀ–ի գործարկումը թույլ կտա ևս 350 աշխատատեղ ստեղծել։

Նախարարն ընդգծել է, որ ընկերությունը ստանձնել է նաև Հայաստանի կառավարության հայտերով միջոցառումների անցկացման պարտավորությունը (10 տարվա ընթացքում)։

Օհանյանը նշեց, որ ՄՀՀ–ի ներդրումային ծրագիրը պետք է իրագործվի չորս տարվա ընթացքում, և նախատեսվում է կառուցել հյուրանոց, ռեստորաններ և այլ օբյեկտներ։