Նովոսիբիրսկի կենդանաբանական այգում Զիտա անունով վագրառյուծը երրորդ անգամ է մայրացել

ԵՐԵՎԱՆ, 13 օգոստոսի– Sputnik. Նովոսիբիրսկի կենդանաբանական այգու վագրառյուծը երկու ձագ է ունեցել, ներկա պահին փոքրիկներն արդեն գտնվում են բաց վանդակում, հինգշաբթի հաղորդել է կենդանաբանական այգու գիտության հարցերով տնօրենի տեղակալ Օլգա Շիլոն։

«Ձագուկների ծնողները նույնն են (վագրառյուծ Զիտան ու առյուծ Սեմը), նրանք ծնվել են հունիսի կեսին»,– ասել է գործակալության զրուցակիցը և նշել, որ փոքրիկներն իրենց լավ են զգում։

Տնօրենի տեղակալը հայտնել է, որ ապագայում վագրառյուծի ձագերին նախատեսվում է ուղարկել աշխարհի այլ կենդանաբանական այգիներ։

«Մենք նրանց հատուկ չենք բաժանել։ Առանձին ենք պահել, բայց…  Մենք հիբրիդներ բազմացնելու ձգտում չունենք»,– ասել է նա` պատասխանելով այն հարցին, որ աշխարհի շատ կենդանաբանական այգիներ հավանություն չեն տալիս խառնածինների բազմացմանը։

Ձագերի մայրը` Զիտան, յուրահատուկ կենդանի է, որը համարվում է Նովոսիբիրսկի կենդանաբանական այգու հպարտությունը։ Նա ծնվել է 2004թ.–ին աֆրիկյան առյուծի և բենգալյան վագրի միությունից։ Բնության մեջ նման բան տեղի չի ունենում, քանի որ առյուծները զույգ են կազմում իրենց տեսակի ներկայացուցիչների հետ։

Զիտայի և Սեմի առաջին ձագուկը ծնվել է 2012 թվականի օգոստոսին, այնուհետև 2013թ.–ի մայիսին Զիտան միանգամից երեք ձագ է ծնել։