Տյանցզինի պայթյունները. ականատեսների նկարահանումները

Չորեքշաբթի Չինաստանի Տյանցզին քաղաքում երկու հզոր պայթյուն է տեղի ունեցել։ Արտակարգ պատահարը գրանցվել է վտանգավոր նյութերով լի պահեստում։ Մահացել է 44 մարդ, կա 520 տուժած։ Դիտեք ականատեսների նկարած կադրերը։

Տյանցզին արդյունաբերական քաղաքում երկու պայթյունների հզորությունը տրոտիլային համարժեքով կազմել է 3 և 21 տոննա, հաղորդում է CCTV հեռուստաընկերությունը` ներկայացնելով սեյսմոլոգների տվյալները։

Մեկ շենք փլուզվել է, տասնյակ շենքեր վնասվել են, փրկարարները փորձում են գտնել փլատակների տակ մնացած մարդկանց։ Զոհերի թիվը հասել է 44–ի, 520–ին տեղափոխել են հիվանդանոց, նրանցից 66–ը ծայրահեղ վիճակում են, մահացածների թվում կան 12 հրշեջներ։ Այս մասին հայտնել է Սինհուա գործակալությունը` հղում անելով փրկարարների շտաբին։

Չորեքշաբթի ժամը 23։30–ին (Երևանի ժամանակով 18։30–ին) 30 վայրկյան տարբերությամբ երկու պայթյուն է գրանցվել Բինհայ շրջանում, Ruihai Logistics լոգիստիկ ընկերության պահեստում, որտեղ պահվել են վտանգավոր նյութեր։ Պայթյուններն այնքան հզոր են եղել, որ դրանք արձանագրել է տեղի սեյսմոլոգիական ծառայությունը։ Ականատեսների խոսքով` պայթյունի ալիքը զգացվել է տասնյակ կիլոմետրերի վրա։

Պայթյուններից հետո հրդեհ է բռնկվել, որի մակերեսը շուրջ 20 հազար քառակուսի մետր է կազմել։ ԶԼՄ–ները հաղորդել են, որ հրդեհի մարման աշխատանքները դադարեցվել են, քանի որ տվյալ պահին անհայտ է պահեստում եղած նյութերի ստույգ բաղադրությունն ու քանակը։
 
Պատահարի պատճառներն առայժմ անհայտ են, սակայն, ԶԼՄ–ների տեղեկություններով, դրանք կարող էին լինել Ruihai Logistics լոգիստիկ ընկերության անվտանգության համակարգում առաջացած խնդիրները։ Ընկերության ղեկավարությունն արդեն բերման է ենթարկվել։