Boeing ընկերությունում հեռանկարային են համարում Հայաստանի ավիացիայի ոլորտը

ԵՐԵՎԱՆ, 13 օգոստոսի– Sputnik. Հայկական ավիացիայի ոլորտում ձևավորված բիզնես միջավայրը նպաստավոր է ոլորտում առաջընթացը խթանելու համար, հայտարարել են Boeing ընկերության ներկայացուցիչներ Մհեր Պապյանն ու Մաքս Նիլովը ՀՀ վարչապետ Հովիկ Աբրահամյանի հետ հանդիպման ժամանակ։

Ինչպես նշվում է կառավարության մամուլի հաղորդագրության մեջ, Boeing–ի ներկայացուցիչները ներկայացրել են Հայաստանի ավիացիայի շուկայի գնահատման և ընդհանուր զարգացումների վերաբերյալ կատարած ուսումնասիրության արդյունքները` նշելով, որ ՀՀ կառավարության կողմից «բաց երկնքի» քաղաքականության որդեգրումը դրական ազդեցություն է ունեցել շուկայի զարգացման վրա։

Կողմերը քննարկել են Հայաստանի ավիացիայի բնագավառի բարեփոխմանն ուղղված մի շարք առաջարկություններ։

Նրանք քննարկել են շուկայի մրցունակության բարձրացմանը, ավիատոմսերի գնային քաղաքականությանը, թռիչքների ժամկետներին վերաբերող հարցեր:

Աբրահամյանը շնորհակալություն է հայտնել Boeing ընկերության ներկայացուցիչներին արդյունավետ համագործակցության և խորհրդատվության համար ու կարևորել համագործակցության շարունակումը:

Boeing պաշտպանական–աէրոտիեզերական ընկերությունը հիմնադրվել է 1916 թ.–ին։ ընկերության կենտրոնական գրասենյակը ԱՄՆ–ի Չիկագո քաղաքում է։ Ընկերության ստորաբաժանումներում աշխատում է ավելի քան 160 հազար մարդ։

«Բաց երկնքի» քաղաքականությունը կամ ավիածառայություններ մատուցելիս մրցակցային պայմանների ապահովման ծրագիրն ընդունվել է ՀՀ կառավարության կողմից 2013 թ.–ի հոկտեմբերի 23–ին «McKinsey & Company»–ի և Հայաստանի ազգային մրցունակության հիմնադրամի համատեղ ուսումնասիրության արդյունքների հիման վրա։