ՍԴ անդամ` Սահմանադրության բարեփոխումների հանրաքվե կարող է անցկացվել նոյեմբերին

ԵՐԵՎԱՆ, 12 օգոստոսի – Sputnik. Սահմանադրական բարեփոխումների հանրաքվեն Հայաստանում կարող է կայանալ արդեն նոյեմբերին, հինգշաբթի լրագրողներին ասաց Սահմանադրական դատարանի անդամ, պրոֆեսոր Ֆելիքս Թոխյանը։

Հայաստանում սահմանադրական բարեփոխումների մասնագիտական հանձնաժողովն օգոստոսի 4–ին Արդարադատության նախարարության կայքում հրապարակել է Հիմնական թարմացված օրենքի նախագծի տասնհինգ գլուխները, որոնք փաստացի նախատեսում են անցում խորհրդարանական կառավարման կարգի։

Թոխյանի կարծիքով, առաջիկա երկու օրերին սահմանադրական բարեփոխումների մասնագիտական հանձնաժողովը կավարտի աշխատանքը։

«Կարծում եմ, որ բարեփոխումների նախագիծն օգոստոսին կներկայացվի նախագահի և խորհրդարանի դիտարկմանը։ Իմ հաշվարկներով, հաշվի առնելով, որ գործընթացն ընթանում է արագ տեմպերով, հանրաքվեն կարող է կայանալ արդեն նոյեմբերին»,– նշեց նա։

Թոխյանը կարծում է, որ Հայաստանում սահմանադրական բարեփոխումների օգտին նշվող հիմնական փաստարկը երկրում իշխանության գերկենտրոնացումն  է և այն ապակենտրոնացնելու անհրաժեշտությունը։

ՍԴ անդամը որպես երկրորդ փաստարկ նշեց իշխանության գերանձնավորման խնդրի լուծման անհրաժեշտությունը, որը կարող է լուծվել բարեփոխումների միջոցով։

Թոխյանը նշեց, որ սահմանադրական բարեփոխումների հանձնաժողովը, որն առաջարկել է փոփոխված հիմնական օրենքի նախագիծ, բաղկացած է պրոֆեսիոնալ իրավաբաններից։ «Կազմվել է փայլուն փաստաթուղթ, որը համապատասխանում է միջազգային չափանիշների, և այդ մասին խոսում է Վենետիկի հեղինակավոր հանձնաժողովի գնահատականը»,– ասաց Թոխյանը։

Ըստ նրա, սահմանադրական բարեփոխումների հիմնական խնդիրները կատավարման կարգի մոդելի փոփոխությունն է, դատական իշխանության անկախության նոր երաշխիքները, ինչը փայլուն արտահայտվել է փաթեթում։

Թոխյանը կարծում է, որ խորհրդարանի կողմից առանցքային պաշտոնների նշանակումը բարեփոխումների դրական կողմն է։ «Նոր Սահմանադրության համաձայն, խորհրդարանի առանցքային հարցերը կլուծվեն միայն ձայների 3/5–ով, ինչն անհնար է դարձնում ընդդիմության զերծ մնալն այդ հարցերի լուծումից»,– ավելացրեց նա։

«Կառավարությունը միաժամանակ ստանում է ամբողջ իշխանությունը երկրում։ Այն կենթարկվի խորհրդարանին, բայց իշխանության իրական կենտրոնը տեղաշարժվում է դեպի կառավարությունը, ընդ որում` վարչապետը դառնում է կարևոր խաղացող»,– ասաց ՍԴ անդամը։

Բացի այդ, Թոխյանը հատուկ նշեց, որ եթե անցած 25 տարիներին Հայաստանում ամրապնդվել են խորհրդարանական և նախագահական ինստիտուտները, ապա անկախ դատական համակարգը մինչ օրս չի կայացել, և սահմանադրական բարեփոխումների նախագիծն այդ իմաստով նախատեսում է զգալի փոփոխություններ։

Նախևառաջ, դա Գերագույն դատական մարմնի ստեղծումն է, որը կլինի դատական իշխանության անկախության երաշխիք։ Խորհուրդը բաղկացած կլինի տասը մարդուց, որոնցից հինգն իրավաբան–գիտնականներ են, մյուս հինգն ընտրովի կլինեն։