«Կուրսկի» նավաստիների հիշատակին հարգանքի տուրք են մատուցել Խաղաղօվկիանոսյան նավատորմում

ԵՐԵՎԱՆ, 12 օգոստոսի – Sputnik. «Կուրսկ» ատոմային սուզանավի վթարի 15–րդ տարելիցին նվիրված հիշատակի արարողություններ են անցկացվել Խաղաղօվկիանոսյան նավատորմում, չորեքշաբթի լրագրողներին ասել է ՌԱՕ մամուլի ծառայության տեղեկատվական ապահովման բաժնի պետ առաջին դասի կապիտան Ռոման Մարտովը։

«15 տարի առաջ «Կուրսկ» ատոմային սուզանավում զոհված նավաստիների հիշատակին հարգանքի տուրք են մատուցել այսօր Խաղաղօվկիանոսյան նավատորմում։ Տեղի ժամանակով ուղիղ կեսօրին Կամչատկայի սուզանավերի միավորման նավերի վրա հիշատակի ցույցեր են անցկացվել»,– ասել է Մարտովը։

Նա նշել է, որ Վլադիվոստոկում Ս.Օ.Մակարովի անվան Խաղաղօվկիանոսյան բարձրագույն ռազմամարզական ուսումնարանի տարածքում կայացել է ցույց Խաղաղօվկիանոսյան նավատորմի հրամանատարության ներկայացուցիչների, կայազորի զինծառայողների և վետերան–սուզանավորդների մասնակցությամբ։

Հուշահամալիրում, որի սալիկների վրա հավերժացել են «Կուրսկ» կրեյսերում զոհված այդ ուսումնական հաստատության շրջանավարտների անունները, ծաղիկներ և ծաղկեփնջեր են դրվել։ «Կուրսկի» անձնակազմին պատվել են մեկ րոպե լռությամբ։

Այսօր լրանում է Բարենցի ծովում սուզված «Կուրսկ» սուզանավի վթարման 15 տարին։ Հյուսիսային նավատորմի ռազմածովային զորավարժությունների ընթացքում տեղի ունեցած վթարում զոհվել են անձնակազմի 118 անդամներ։ Այդ դեպքը ստիպել է Ռուսաստանի ՌԾՆ որոնողական և վթարային–փրկարար աշխատանքների ծառայությանն արդիականացնել փրկարարական սարքավորումները և անցնել սուզանավորդների անվտանգության ապահովման նոր քայլերի որոնմանը։