ԵՐԵՎԱՆ, 12 օգոստոսի — Sputnik. Եվրասիական տնտեսական միությանը Ղրղզստանի անդամակցումը նոր ազդակ կհաղորդի դրա զարգացմանը, նշվում է Եվրասիական տնտեսական հանձնաժողովի հայտարարությունում։
Չորեքշաբթի առավոտյան Ղազախստանի նախագահ Նուրսուլթան Նազարբաևը և Ղրղզստանի նախագահ Ալմազբեկ Աթամբաևը հայտարարել են, որ Ղրղզստանը դարձել է Եվրասիական տնտեսական միության լիիրավ անդամ։ Այդ պահից ի վեր չեղյալ է հայտարարվել մաքսային հսկողությունը ղրղզա–ղազախական պետական սահմանի բոլոր ութ անցակետերում, և Ղրղզստանի տարածքում ուժի մեջ են մտել միասնական մաքսային սակագինը և ԵՏՄ արտաքին տնտեսական գործունեության միասնական ապրանքային նոմենկլատուրան, ինչպես նաև արտադրանքի միասնական պահանջները, որոնք սահմանել են մաքսային միության տեխնիկական կանոնակարգեր։
«Ղրղզստանի միացումը նոր ազդակ է հաղորդում միության ներուժի զարգացմանը։ Ինտեգրացիոն միավորումն ուժեղացնում է իր դիրքերը տնտեսական գլոբալ ճարտարապետությունում»,– ասվում է հայտարարությունում։
Փաստաթղթում նշվում է, որ Ղրղզստանի միացումը ԵՏՄ–ին «ինտեգրացիոն մերձեցման ուղղությամբ տարված համատեղ մեծ աշխատանքի արդյունքն է»։ «2014 թվականին իրագործվել են եվրասիական ինտեգրացիոն նախագծին Ղրղզստանի միացման «ճանապարհային քարտեզները», որոնք նպաստել են երկրի հարմարեցմանը ԵՏՄ օրենսդրությանն ու պրակտիկաներին։ Մասնավորապես, լուծվել է մաքսային ենթակառուցվածքի օբյեկտների արդիականացման հետ կապված հարցերի մի մեծ հատված»,– նշում է ԵԱՏՀ–ն։
Հանձնաժողովի կարծիքով, «ԵՏՄ–ին անդամակցելը Ղրղզստանի համար նոր հեռանկարներ է բացում»։ «Հանվում են ապրանքների շարժման, ծառայությունների, կապիտալի և աշխատուժի արգելքները։ Ներդրումային նոր հնարավորություններ և խոշոր ենթակառուցվածքային նախագծերի, նախևառաջ, էներգետիկայի, տրանսպորտի և գյուղատնտեսության ոլորտներում հեռանկարներ են բացվում։ Ղրղզստանի քաղաքացիները միության ցանկացած պետությունում, ինչպես այդ պետության քաղաքացիները, նույն իրավունքով աշխատելու իրավունք են ստանում»,– նշել են ԵԱՏՀ–ում։
