ԵՐԵՎԱՆ, 12 օգոստոսի — Sputnik. ՀՀ պաշտպանության նախարարությունը տեղեկացնում է, որ նախորդ գիշեր ադրբեջանական դիվերսիոն խմբերի կողմից ձեռնարկվել է սահմանագոտի ներթափանցելու երկու փորձ, որոնք ձախողվել են:
Բացի այդ, Պաշտպանության նախարարության տարածած հաղորդագրության համաձայն` օգոստոսի 11-12 գիշերը միայն 82 մմ-ոց ականանետերից ադրբեջանական զինված ուժերը արձակել են 109 ական:
«Եվրոպական խաղերից հետո Ադրբեջանի ռազմաքաղաքական ղեկավարությունը փորձում է անկայուն պահել իրավիճակը հայ-ադրբեջանական պետական սահմանին: Հրադադարի ամենօրյա խախտումները իրականացվում են տարբեր տրամաչափի հրաձգային զենքերից, ինչպես նաև 60 և 82 մմ-ոց ականանետերից»,– նշվում է հաղորդագրության մեջ։
ՀՀ ՊՆ–ից հիշեցրել են, որ հայկական կողմը Ադրբեջանի ռազմաքաղաքական ղեկավարությանը բազմիցս զգուշացրել է, որ հակամարտությունը ռազմական ճանապարհով լուծելու ձգտումներն ու հայտարարություններն ինքնախաբեություն են, իսկ այդ տրամաբանությամբ ձեռնարկվող սադրանքները Ադրբեջանի բանակի համար հղի են անկանխատեսելի հետևանքներով:
«ՀՀ պաշտպանության նախարարությունը կրկին կարևորում է հակամարտությունը բացառապես խաղաղ ճանապարհով լուծելու և այդ նպատակով ուժերի շփման գծում հրադադարի ռեժիմի պահպանման, փոխվստահության միջավայրի ձևավորման, ինչպես նաև հրադադարի խախտումների միջազգային հետաքննության մեխանիզմների ներդրման անհրաժեշտությունը», – նշել են գերատեսչությունից։
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ.–ի դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Հանրաքվեին հաջորդեցին Ադրբեջանի ձեռնարկած ռազմական լայնածավալ գործողությունները, որոնց հետևանքով Ադրբեջանը կորցրեց վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ.–ի մայիսի 12-ին զինադադարի վերաբերյալ եռակողմ համաձայնագիր կնքելուց հետո հակամարտության գոտում դադարեցին ռազմական գործողությունները, որոնց հետևանքով երկու կողմն ընդհանուր առմամբ շուրջ 25-30 հազար զոհ ունեցավ, իսկ մոտ մեկ միլիոն մարդ էլ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակում, որի համանախագահներն են ԱՄՆ-ն, Ռուսաստանը և Ֆրանսիան:
Ադրբեջանական դիվերսիոն խմբերը սահմանագոտի ներթափանցելու երկու անհաջող փորձ են կատարել
© Photo : press office of the MoD of RA
Բաժանորդագրվել
Եվրոպական խաղերից հետո Ադրբեջանի ռազմաքաղաքական ղեկավարությունը փորձում է անկայուն պահել իրավիճակը հայ-ադրբեջանական պետական սահմանին
