ԱՆ. Հայաստանում բոտուլիզմի դեպքերը շատացել են, սակայն մահվան դեպք չի գրանցվել

ԵՐԵՎԱՆ, 11 օգոստոսի– Sputnik. 2015թ.–ի առաջին կիսամյակին Հայաստանում 17 մարդ է հիվանդացել բոտուլիզմով, բայց մահվան դեպքեր չեն գրանցվել, երեքշաբթի լրագրողներին ասաց առողջապահության նախարարության Առողջապահական պետական տեսչության հիգիենայի բաժնի պետ Մարգարիտա Բաբայանը։

Նրա խոսքով` անցած ամիսներին գրանցվել է բոտուլիզմի 12 դեպք` 2014թ.–ի նույն շրջանի 9–ի դիմաց, որոնց հետևանքով տուժել է 11 մարդ։

Փորձագետը նշել է, որ բոտուլիզմի ամենատարածված պատճառներից մեկը տնային պահածոների օգտագործումն է, նա կոչ է արել փոխարինել դրանք գործարանային արտադրության պահածոներով։

«Տնային պահածոները վտանգավոր են, քանի որ դրանցում կարող են լինել բոտուլիզմի հարուցիչներ։ Ամռանը տնտեսուհիները պատրաստում են պահածոներ, իսկ ձմռանը դրանցից կարելի է թունավորվել, քանի որ (տեխնոլոգիաներին չհետևելու դեպքում) դրանց մեջ կարող է մահացու վտանգավոր թույն լինել»,– նշեց Բաբայանը։

Նա թվարկել է բոտուլիզմի հիմնական ախտանիշները` սրտխառնոց, գլխացավ, գլխապտույտ, փսխում, չորություն բերանում։
 
«Եթե ձեզ մոտ կամ ձեր մտերիմների մոտ դրսևորվում է թվարկված ախտանիշներից մեկը, ապա անհապաղ դիմեք բժշկի, հակառակ դեպքում հետագայում կարող են խնդիրներ ծագել»,– ընդգծեց Բաբայանը։

Ինչ վերաբերում է սնկերից թունավորվելու դեպքերին, ապա փորձագետը նշեց, որ նման դեպքերն առավել հաճախ հանդիպում են Լոռու մարզում։

«2014թ.–ին արձանագրվել է սնկերից թունավորման 27 դեպք, տուժել է 36 մարդ, որոնցից մեկը մահացել է։ Իսկ այս տարի առաջին կիսամյակում արձանագրվել է 8 դեպք, կան 9 տուժածներ»,– ասաց Բաբայանը։