ԵՐԵՎԱՆ, 11 օգոստոսի– Sputnik. Համահայկական վեցերորդ խաղերի շրջանակում անցկացվող շախմատի մրցումներն ավարտվել են երեքշաբթի Երևանի «Շախմատի տանը»։
Ինչպես «Sputnik-Արմենիա» կայքին է հայտնել մրցումների գլխավոր մրցավար, Հայաստանի շախմատի ֆեդերացիայի գործադիր տնօրեն Նորայր Քալանթարյանը, կանանց մրցաշարում առաջին տեղը զբաղեցրել է Մարիամ Ավետիսյանը (Երևան), երկրորդ տեղը` Սոնա Ասատրյանը (Աշտարակ) և երրորդ տեղը` Անի Իվանյանը (Գյումրի)։
Տղամարդկանց շարքում հաղթող է ճանաչվել Էդուարդ Մկրտչյանը (Աբովյան), երկրորդ տեղը զբաղեցրել է Դավիթ Տիրատունյանը (Գյումրի), երրորդ տեղում է Սարգիս Մանուկյանը (Երևան)։
Քալանթարյանի խոսքով` մրցաշարին մասնակցել է 181 շախմատիստ` 128 տղամարդ և 53 կին։ Տարիքային սահմանափակումներ չեն եղել։
Համահայկական վեցերորդ խաղերը Հայաստանում և Լեռնային Ղարաբաղի Հանրապետությունում մեկնարկել են 3-ին։ Խաղերին մասնակցում են ավելի քան 6,35 հազար հայ մարզիկներ աշխարհի 36 երկրի 175 քաղաքից։ Փակման արարողությունը տեղի կունենա օգոստոսի 13-ին։
