Չինաստանը չի շտապում յուանն «ազատ լողի» բաց թողնել

ԵՐԵՎԱՆ, 11 օգոստոսի — Sputnik. Չինաստանի ժողովրդական բանկի` դոլարի նկատմամբ յուանը ռեկորդային 1.9 տոկոսով նվազեցնելու որոշումը պայմանավորված է գլխավորապես ազգային արժույթի բարձր փոխարժեքի պատճառով արտահանմանն ուղղված ձեռնարկությունների` տնտեսական բարդությունների պատճառով առաջացած սոցիալական մտահոգություններով, կարծում է Մոսկվայի Կարնեգի կենտրոնի «Ռուսաստանն Ասիական–խաղաղօվկիանոսյան տարածաշրջանում» ծրագրի ղեկավար Ալեքսանդր Գաբուևը։ Ըստ նրա, յուանի փոխարժեքի սահմանման հարցում շուկայի դերի բարձրացման մասին այժմ խոսելն անիմաստ է, ավելի շուտ, խոսքը հակառակ միտման մասին է։

Չինաստանի ժողովրդական բանկը երեքշաբթի 1.9 տոկոսով նվազեցրել է դոլարի նկատմամբ յուանի պաշտոնական փոխարժեքը։ Դոլարի նկատմամբ յուանի փոխանակման միջին փոխարժեքը կարգավորիչը սահմանել է 6.2298 մակարդակում նախորդ օրվա 6.1162–ի դիմաց։ ԿԲ–ն նշել է, որ քայլը միանգամյա էր, ավելացնելով, որ կպահպանի յուանի կայունությունը ռացիոնալ մակարդակում և կամրապնդի շուկայի դերը ֆիքսինգում։

Չինաստանի ժողովրդական բանկը դոլարի նկատմամբ յուանի փոխարժեքի նվազման գործոններից մեկը համարել է արժութային բարձր արդյունավետության փոխարժեքը։ Իշխանությունների կարծիքով, ուժեղ յուանը ճնշում է գործադրում արտահանման նկատմամբ։ Նախորդ շաբաթ իշխանությունները հրապարակել են հուլիսի մակրոտնտեսական վիճակագրությունը։ Չինական արտահանումը տարեկան կտրվածքով նվազել է 8.3 տոկոսով, իսկ վերլուծաբաններն ակնկալում էին 1–տոկոսանոց նվազում։ 

Կուսակցության գլխավոր խնդիրը

Փորձագետը յուանի արժեզրկումը «բավականին սպասելի» է համարել հուլիսի արտահանման համատեքստում։

«Բանն այն է, որ Ժողովրդական բանկի որոշումը պայմանավորված է չինական արտահանման պաշտոնական ծրագրերով։ Ակնհայտ է, որ տարվա ընթացքում տվյալները նվազել են, և այժմ խնդիրն արտահանման հատվածի խթանումն է։ Գոյություն ունեն արվարձաններ և արտահանմանն ուղղված ձեռնարկությունների կլաստերներ, որտեղ մարդիկ կորցնում են աշխատանքը և զրկվում գոյության միջոցներից։ Դա կարող է սոցիալական լուրջ հետևանքներ ունենալ, և կուսակցության առաջին և գլխավոր խնդիրն այդպիսի հետևանքներ թույլ չտալն է»,– ասել է Գաբուևը ՌԻԱ Նովոստիին։

Ըստ նրա, երկու պատմություններից Պեկինը կարող է անել հետևյալ եզրակացությունը` շուկայական լողի մեջ թե արժույթը, թե ֆինանսական համակարգը բաց թողնելը վաղ է, պետք է պահպանել ֆինանսների վերահսկողության առկա լծակները։

Հետևանքներ

Գաբուևը դժվարացել է կանխատեսել, թե արդյո՞ք յուանի փոխարժեքի նվազումն ակնկալվող ազդեցությունը կունենա արտահանման վրա։ Ցանկացած դեպքում, եթե այդպես չլինի, ապա «հնարավոր է, հետագա մեղմում նկատենք»։ Ու թեև փորձագետը տարածաշրջանում «արժեզրկումների մրցավազք» չի ակնկալում, երբ Չինաստանի մրցակից երկրները կսկսեն արժեզրկել սեփական արժույթները մրցունակությունը չկորցնելու համար, յուանի փոխարժեքի հետագա նվազման հավանականությունը թույլ չի տալիս բացառել նաև իրադարձությունների այսպիսի զարգացումը։

Խոսելով Ժողովրդական բանկի` Ռուսաստանի հետ տնտեսական հարաբերությունների որոշման հետևանքների մասին` Գաբուևն ընդգծել է, որ «այն ոչինչ չի սպառնում», քանի որ «առևտուրը հիմնականում դոլարի միջոցով է, փոխադարձ հաշվարկների ծավալը յուանի միջոցով ընդամենը 7 տոկոս է»։