Իստրինսկի ջրամբարի մոտակայքում տեղի ունեցած արտակարգ պատահարի զոհերի թվում հայեր կան

ԵՐԵՎԱՆ, 9 օգոստոսի– Sputnik. Մոսկվայի մարզի Իստրինսկի ջրամբարի մոտակայքում իրար են բախվել հիդրոինքնաթիռն ու ուղղաթիռը։ Ըստ LifeNews–ի հրապարած զոհերի ցուցակի` զոհերի թվում հայեր կան։

Նախօրեին երեկոյան Երևանի ժամանակով մոտավորապես ժամը 20։20–ին իրար են բախվել Cessna U-206F տիպի հիդրոինքնաթիռը (RA-67523 բորտային համարանիշով) և Robinson-44 տիպի մասնավոր ուղղաթիռը։ Բախումը տեղի է ունեցել Իստրինսկի ջրամբարի մոտակայքում` ափային գծից 500 մետր հեռավորության վրա։

Ինչպես հայտնում է LifeNews–ը, մասնավոր հիդրոինքնաթիռում եղել են օդաչու Միխայիլ Երմոլչևը և չորս ուղևորներ` Լարիսա Մանուկյանը, Պարույր Մանուկյանը, երկու անչափահաս երեխաներ` Էրիկը (ազգանունը պարզված չէ) և Աֆելյա Գ.–ն։

Ուղղաթիռում բացի փորձառու օդաչու, սպորտի վարպետ Վադիմ Բուխտիյարովից, եղել են նաև երեք ուղևորներ` Օլգա Բագրովան, Ելիզավետան (ազգանունը պարզված չէ), Մամեդ Ռեզաևը։

Ինչպես հաղորդում է LifeNews–ը, առաջ է քաշվում պատահարի երեք վարկած, որոնց թվում է նաև հիդրոինքնաթիռի օդաչուի սխալը։ Պատահարի ականատեսների խոսքերով` նա իրեն բավականին ագրեսիվ է դրսևորել օդում։ Սակայն բացառված չէ, որ ավիավթարի պատճառը տեխնիկայի անսարքությունն է։

Ռոսավիացիայի աղբյուրը ՌԻԱ Նովոստիին հաղորդել է, որ Cessna տիպի ինքնաթիռը օդ է բարձրացել Շևլինոյի թռիչքուղուց և թռչել Իստրինսկի ջրամբարի վրայով` չտեղեկացնելով դիսպետչերական ծառայություններին։ Իսկ Robinson ուղղաթիռն օդ է բարձրացել Լեչիշչևո թռիչքուղուց և այդ մասին տեղեկացրել դիսպետչերներին` ներկայացնելով թռիչքի պլանը։

Արտակարգ պատահարի փաստի առթիվ հարուցվել է քրեական գործ «Օդային տրանսպորտի երթևեկության անվտանգության կանոնների խախտում, որը հանգեցրել է երկու և ավել թվով մարդկանց մահի»։Միջադեպի վայր են ժամանում զոհվածների և անհետ կորածների հարազատները։ Նրանց հոգեբանական օգնություն է ցուցաբերվում։