Տնտեսագետ. բենզինը ՌԴ–ում կթանկանա, եթե նավթ վերամշակողների համար արտոնություններ չլինեն

ԵՐԵՎԱՆ, 7 օգոստոսի — Sputnik. Ռուսաստանում նավթի վերամշակմամբ զբաղվող գործարանների համար արտոնությունների բացակայությունը կհանգեցնի նրան, որ բենզինը կթանկանա, «Sputnik–Արմենիա» պորտալին ասաց տնտեսագետ Վիլեն Խաչատրյանը։

ՌԴ նախագահ Վլադիմիր Պուտինին հասցեագրած ուղերձում «Ռոսնեֆտի» ղեկավար Իգոր Սեչինն առաջարկել էր լրացուցիչ արտոնություններ կիրառել նավթ վերամշակող ձեռնարկությունների համար, հակառակ դեպքում Ռուսաստանը 2017 թվականին ներքին շուկայում բենզինի դեֆիցիտ կունենա սպառման ներկա մակարդակի պահպանման դեպքում։ Ինչպես նշվում է Սեչինի նամակում, նման հետևանքների կարող է հանգեցնել խոշոր նավթային ընկերությունների գործարանների արդիականացման նախագծերի ամբողջական դադարեցումը կամ ձգձգումը։ 

«Եթե Ռուսաստանը սկսի ավելի քիչ քանակի նավթ արտահանել, հնարավոր է` երկրի ներսում գները բարձրանան։ Այսինքն` նավթի գներն այժմ ցածր են, բայց Ռուսաստանում դրանց ծավալները կնվազեն, այդպես շատ նախագծեր կփակվեն։ Նավթի ցածր գների պատճառով արդյունահանման ընթացիկ մակարդակի պահպանումն անհնար կլինի, կնվազեն ընդլայնման կամ արտահանման ծավալների պահպանման հնարավորությունները», – ասաց Խաչատրյանը։

Նա ընդգծեց, որ օրինակ բենզինի «Եվրո-3» կամ «Եվրո-5» տեսակների վերամշակման համար անհրաժեշտ է ներդրումներ կատարել և արդիականացնել ենթակառուցվածքն ու ՆՎԳ–ն։ «Եթե արտոնություններ չլինեն, ապա նրանց միջոցները չեն բավականացնի», – ասաց տնտեսագետը։

Նրա խոսքով` արտահանման նվազումը կազդի Ռուսաստանի պետբյուջեի վրա, կնվազեն դոլարային մուտքերը, ինչը չի կարող չազդել ՌԴ–ում աշխատող հայերի վրա։ Դա էլ իր հերթին կհանգեցնի նրան, որ կնվազեն դեպի Հայաստան կատարվող փոխանցումները։

«Նավթային եկամուտների նվազումը բացասաբար կանդրադառնա նաև խոշոր շինարարության վրա, իսկ հայերը մեծ մասամբ զբաղված են շինարարության և առևտրի ոլորտներում», – ասաց Խաչատրյանը։

Դաշնության մաքսային ծառայության տվյալով` 2014 թվականին Ռուսաստանն օրական արտահանել է ավելի քան 4.7 մլն բարել նավթ, ներառյալ` գազային կոնդենսատը։