Ժերար Դեպարդիեն և Սեմի Նասերին կխաղան հայ–թուրքական թեմային նվիրված ֆիլմում

ԵՐԵՎԱՆ, 7 օգոստոսի – Sputnik. Ֆրանսիացի հայտնի դերասաններ Ժերար Դեպարդիեն և Սեմի Նասերին կխաղան հայ–թուրքական թեման շոշափող նոր ֆիլմում, որի երաժշտությունը գրելու է հանրահայտ կոմպոզիտոր Միշել Լեգրանը։

«Հայ մշակույթի զարգացման ֆոնդի» նախագահ Մեցցո Իգիթյանը Facebook–ի իր էջում գրել է, որ «Անատոլիական պատմություն» (Anatolian Story) դրամայի ռեժիսորը Արտակ Իգիթյանն է։

Իգիթյանի խոսքով` ֆրանսիացի հանրաճանաչ կոմպոզիտորը ցանկացել է, որ ֆիլմի ենթագրերում առաջին անգամ Լեգրան ազգանվան կողքին նշվի նաև Տեր–Միքայելյան ազգանունը, որը կհիշեցնի մաեստրոյի հայկական ծագումը։

Ֆիլմի գլխավոր հերոս Մուսթաֆայի դերում հանդես կգա ֆրանսիացի կինոդերասան Ժերար Դարմոնը (հայտնի է Գեորգի Դանելիայի «Անձնագիր» ֆիլմից և Ջորջո Կապելանիի «Կալասն ու Օնասիսը» կինոնկարից` Օնասիսի դերով), նրա որդու` Սուլեյմանի դերը կստանձնի Սեմի Նասերին («Տաքսի», «Աղջիկներն ու հրեշտակները»)։

Սուլեյմանի ընկերոջ դերում հանդես կգա Օլիվիե Սիտրուկը («Կոկո Շանել», «Աստվածային Էմիլին»)։ Ֆիլմում նաև կմասնակցեն հայտնի ֆրանսիացի կինոդերասանուհիներ Իրեն Ժակոբը և Ժան Պոլ Գաբենը` ֆրանսիական ֆիլմի լեգենդար դերասանի թոռը։

Ժերար Դեպարդիեն հրավիրվել է փաստաբան Բլյումենտալի դերը մարմնավորելու համար։

Ինչպես նշված է kinopoisk.ru կայքում, սյուժեի հիմքում հայ–թուրքական բազմադարյա հակամարտությունն է, որը ներխուժում է տարբեր տարիքի, աշխարհայացքի, ինչպես նաև տարբեր ճակատագրեր և կարգավիճակ ունեցող մարդկանց կյանք։
Գլխավոր հերոսը` Մուսթավա Գազին, երիտասարդ տարիքից ծառայում է Թուրքիայի համար և հասուն տարիքում, երբ այլևս ոչինչ հնարավոր չէ փոխել, ճակատագիրը նրան կանգնեցնում է անցյալի առաջ և ստիպում վերաիմաստավորել կյանքը։

Ողջ կյանքում հայերին ատած մարդը հանկարծ պարզում է, որ ինքը ծագումով հայ է։ Ի՞նչ անել։ Ո՞րն է կարևոր` լսել, թե չլսել անցյալի ձայնը։ Ի՞նչն է ավելի ուժեղ` վաղեմի թշնամությո՞ւնը, թե՞ բիզնեսը, իսկ գուցե սե՞րը։ Ծանր կապանքները թոթափելու համար պետք է ընդունել անցյալի սխալները։ Ո՞րն է ճշմարտությունը, եթե հակամարտող կողմերն ունեն ճշմարտության իրենց տարբերակը։

Ֆիլմի նկարահանումերը կսկսվեն 2015 թվականի նոյեմբերին և կիրականացվեն Ֆրանսիայում, Գերմանիայում, Թուրքիայում և Հայաստանում։ Սցենարը գրել է հայտնի գրող Մարկ Արենը (սա Կարեն Մարգարյանի կեղծանունն է)` իր համանուն վեպի մոտիվներով։