ԵՐԵՎԱՆ, 7 օգոստոսի – Sputnik. Վրաստանի եվրաինտեգրման արդարացված կամ չարդարացված լինելն այժմ դժվար է ասել, քանի որ և եվրոպական կողմը, և Վրաստանի ղեկավարությունը հնչեցրել են, որ եվրաինտեգրումը տևական գործընթաց է, և դրա արդյունքներն անմիջապես տեսնելն անհնար է: Ինչպես «Sputnik-Արմենիա» ռադիոկայանի հետ զրույցում ասել է Վրաստանի հարցերով փորձագետ Նարեկ Մինասյանը, գործընթացը ժամանակատար է, քանի որ խոսքը տնտեսական ասպեկտի մասին է:
«Տեղի են ունենում արմատական բարեփոխումներ, որոնք երկարաժամկետ կտրվածքով միայն կարող են ցույց տալ իրենց արդյունքները: Եվ այո, վրացի արտադրողների համար որոշակիորեն դժվար է մրցակցել եվրոպական շուկայում, սակայն տեղի են ունենում չափորոշիչային փոփոխություններ, մաքսային գործընթացների դյուրացումներ, ինչի արդյունքում, այնուամենայնիվ, ապահովվում է վրացական արտադրանքի մուտքը եվրոպական շուկա»,-նշել է փորձագետը: Թե որքանո՞վ վրացիներին կհաջողվի մրցունակ լինել եվրոպական շուկաներում, Մինասյանը դժվարանում է ասել, սակայն կարծում է, որ երկարաժամկետ կտրվածքում հնարավոր կլինի հաղթահարել այդ խնդիրը:
Վրաստանը միացել է Ռուսաստանի դեմ Եվրամիության պատժամիջոցներից մեկին, որը վերաբերում է Ղրիմից և Սևաստոպոլից ապրանքների ներմուծման արգելքին: Արևմտյան պատժամիջոցներին ի պատասխան՝ ռուսական կողմը հայտարարեց, որ առաջնորդվում է փոխադարձության սկզբունքով, այսինքն՝պատասխան պատժամիջոցներ է կիրառելու իր դեմ սահմանափակումներ կիրառող երկրների դեմ: Վրացագետն ընդգծում է, որ Վրաստանի հասարակական շրջանակներում սա որոշակի մտահոգությունների տեղիք տվեց: «Մասնավորապես՝ պայմանավորված այն հանգամանքով, որ հնարավոր է Ռուսաստանը կրկին էմբարգո սահմանի վրացական որոշ ապրանքատեսակների նկատմամբ: Այդ ամենն առավել իրատեսական դարձավ, երբ «Ռոսպոտրեբնադզոր»-ը հայտարարեց, որ վրացական գինեգործական ընկերությունները պարբերաբար խախտում են տեխնոլոգիաները, իսկ վերահսկիչ մարմինները չեն վերահսկում թողարկվող արտադրանքն ինչպես հարկն է»,-ասել է բանախոսը:
Հայտարարության մեջ մասնավորապես նշվել էր, որ 45 արտադրողի մոտ տասը խմբաքանակ չի համապատասխանում նորմատիվային պահանջներին: Վրացագետը սա լուրջ հիմք է համարում ռուսական կողմի համար՝ վրացական գինիների ներմուծումը Ռուսաստան արգելելու համար: «Սա, իրոք, մտահոգիչ է վրացական կողմի համար, քանի որ անկախ նրանից, որ վերջին տարիներին վրացի գինեգործները փորձում էին այլընտրանքային շուկաներ գտնել, այնուամենայնիվ, ռուսական շուկան վրացական գինու իրացման հիմնական շուկաներից է, և այս սահմանափակումները լուրջ հարված կհասցնեն Վրաստանի տնտեսությանը»,-համոզմունք է հայտնել Նարեկ Մինասյանը:
Ռուսական շուկայում վրացական ապրանքների հնարավոր էմբարգոն լուրջ հարված կհասցնի Վրաստանի տնտեսությանը. վրացագետ
18:11 07.08.2015 (Թարմացված է: 18:12 07.08.2015)
Բաժանորդագրվել
Վրացի արտադրողների համար որոշակիորեն դժվար է մրցակցել եվրոպական շուկայում
