Բրազիլիայում ուղիղ եթերի ժամանակ ռադիոհաղորդավար է սպանվել

ԵՐԵՎԱՆ, 7 օգոստոսի – Sputnik. Երկու անհայտ անձինք սպանել են Radio Liberdade FM ռադիոկայանի հաղորդավարին ուղիղ եթերի ժամանակ, ներխուժելով ստուդիա հենց եթերի ժամանակ, հայտնում է La Prensa տեղեկատվական պորտալը` հղում անելով տեղական ոստիկանությանը։

Միջադեպը տեղի է ունեցել Բրազիլիայի հյուսիս–արևելյան Սեարա նահանգի Կամոսին համայնքում։

Ոստիկանության տվյալներով, անծանոթները կարողացել են մտնել ռադիոկայանի շենք գովազդ տեղադրելու քողի տակ։ Նրանք վճարել են ադմինիստրատորին և ներս անցել։ Այնուհետև նրանք մտել են այն ստուդիան, որտեղ ծրագիր է վարել ռադիոհաղորդավար Գլեյդսոն Կարվալիուն (Gleydson Carvalho), և կրակել են նրա վրա։

Կարվալիուն տեղափոխվել է հիվանդանոց, սակայն ստացած վնասվածքներից մահացել է։

Բրազիլացի ռադիոհաղորդավարի սպանությունը մեծ աղմուկ է բարձրացրել տարածաշրջանում, ոստիկանությունը պարզում է հանցագործության հանգամանքներն ու հանցագործների դրդապատճառները

Ինչպես հայտնում է La Prensa, Կարվալիուն իր ծրագրերում հանդես է եկել որոշ քաղաքական գործիչների մասին բացահայտող նյութերով, ինչի պատճառով Facebook սոցիալական ցանցի իր էջում հաճախ սպառնալիքներ է ստացել։