Համահայկական խաղերի շրջանակում Լոս Անջելեսի բասկետբոլիստները երևանյան «Դինամո» մարզադահլիճում հանդիպել են Բուենոս Այրեսի իրենց հայրենակիցների հետ։ Չնայած արգենտինահայերի լավ մեկնարկին` «ամերիկացիները» լավագույն պատրաստվածության շնորհիվ կարողացել են 87-59 հաշվով վստահ հաղթանակ գրանցել։ Շարա Բաբախանյանցը և Կարեն Սփենջյանը համաձայնել են պատասխանել «Sputnik-Արմենիա» պորտալի թղթակցի հարցերին։
Նախևառաջ, շնորհավորում ենք լավ խաղի կապակցությամբ։ Սրանք ձեզ համար հաշվով որերո՞րդ խաղերն են։
Բաբախանյանց — Շնորհակալություն։ Առաջին անգամ չէ, որ Հայաստանում եմ։ Զբաղվում եմ բասկետբոլով մոտավորապես ինը տարեկանից։ Խաղացել եմ ավագ դպրոցում, քոլեջում։ Համահայկական խաղերին մասնակցել եմ 2011. 2013 թվականին և այժմ։ Յուրաքանչյուր ամառ ձգտում եմ այստեղ, թեև երբեմն խանգարում են գործերը։ Բայց Երևանն իմ հարազատ քաղաքն է։
Սփենջյան — Շնորհակալ եմ շնորհավորանքի համար։ Երևան գալիս եմ չորրորդ անգամ և ասեմ, որ տարբերությունը բավականին շոշափելի է։ Նախորդ անգամ ավելի պակաս թվով մասնակիցներ էին, իսկ այս անգամ ավելի շատ են։ Այցերի միջև տարբերությունը նկատելի է, ամեն ինչ ավելի ժամանակակից է դառնում, զարգանում է գիշերային կյանքը։ Հաճելի է, որ մարդիկ ավելի ժպտադեմ են դարձել։
Ի՞նչ են ձեզ համար նշանակում Համահայկական խաղերը։
Բաբախանյանց— Մեզ համար սա Հայաստան ժամանելու, այն տեսնելու, մեր հայրենակիցների հետ հանդիպելու գերազանց առիթ է։ Միմյանց հետ հավաքվելու և մրցելու։
Սփենջյան — Ինձ հաճելի է այստեղ լինել ամեն անգամ։ Ես շատ հպարտ եմ, որ հայ եմ և այսօր այստեղ եմ ելույթ ունենում։
Ցանկանում են, արդյո՞ք, սփյուռքահայերը խաղալ Հայաստանի հավաքանում։
Բաբախանյանց — Այո, իհարկե։ Մենք ունենք խաղացողներ, ովքեր պրոֆեսիոնալներ են Գերմանիայում, Լիբանանում։ Նրանք կցանկանային խաղալ Հայաստանի հավաքականի համար։
Սփենջյան— Ես, Մայք Դանիելյանը, Շարան մտածում ենք այդ հարցի շուրջ։ Շատ ենք ուզում խաղալ եվրոպական ակումբներում։
Այս տարիներին դուք տարբերություն նկատե՞լ եք հայ բասկետբոլիստների խաղում։
Բաբախանյանց – Այո, նրանց խաղը զգալիորեն բարելավվել է, նրանք զարգանում են։ Մենք ֆուտբոլային լավ հավաքական ունենք, բայց ես հույս ունեմ, որ բասկետբոլը կհասնի նույն մակարդակին։
Սփենջյան — Այո, իհարկե, առաջընթացը զգալի է։ Թեև այստեղ դաշտն ավելի մեծ է, և մարզադաշտերում ավելի շոգ է (ծիծաղում է)։ Դժվար է խաղալը։
Հաջորդ Համահայկական խաղերին կգա՞ք
Բաբախանյանց — Ես 26 տարեկան եմ, բայց հույս ունեմ դեռ մի քիչ էլ մասնակցել։ (ժպտում է)։
Սփենջյան. (Ծիծաղում է)։ Հույս ունեմ։
