Սուրիկ Խաչատրյանն անօրինական է համարում որդու ձերբակալումը

ԵՐԵՎԱՆ, 6 օգոստոսի– Sputnik. Սյունիքի մարզպետ Սուրիկ Խաչատրյանը այսօր կառավարության նիստից հետո լրագրողների հետ զրույցում վստահեցրել է, որ իր որդին՝ Տիգրան Խաչատրյանը, հոգեկան խնդիրներ չունի, հաղորդում են հայկական ԶԼՄ–ները:

Սուրիկ Խաչատրյանի խոսքով, իր որդին՝ այժմ կալանքի տակ գտնվող Տիգրան Խաչատրյանը, բանակից տարկետման իրավունք է ստացել, քանի որ 2013 թվականի հունիսին Գորիսում իրենց տան մոտ տեղի ունեցած սպանության հետևանքով «ցնցումներ է ունեցել»:

«Տարկետման իրավունքը հիմնականում, բռնվելուց ցնցումների մեջ էր, այդ երեք ամիսը, որ ձերբակալված էր: Իսկ դրանից հետո էլ դատաքննությունը գնում էր, իրեն չէին կարող զորակոչել: Բայց ավարտվի դատաքննությունը, այս քննությունն էլ կգնա, ընթացքի մասին բոլորիս հայտնի կլինի», — կառավարության շենքի մոտ, ի պատասխան «Ազատություն» ռադիոկայանի հարցին, ասել է Սյունիքի մարզպետը:

Հարցին, թե ինչով է պայմանավորում, որ միջադեպից գրեթե երեք ամիս անց որոշվեց ձերբակելել իր որդուն, Խաչատրյանն արձագանքել է, որ ինքն էլ չի հասկանում: Նրա կարծիքով` այդ ձերբակալումն անօրինական է եղել: «Բայց ամեն դեպքում ես խնդիր էլ չեմ տեսնում: Քննությունը կգնա իրա արդար ճանապարհով և լուծումը կստանա»:

Լրագրողների հարցին, թե հնարավոր է կրկին հրաժարական տա, մարզպետը պատասխանել է. «Չեմ կարծում: Չեմ ուրախացնի ձեզ»:

«Հայկական ժամանակ» պարբերականը երեկ գրել էր, թե պաշտպանության նախարարի խոսնակ Արծրուն Հովհաննիսյանը հաստատել է տեղեկությունը, որ Սյունիքի մարզպետի որդին՝ Տիգրան Խաչատրյանը բանակից 3 տարի ժամկետով տարկետում է ստացել՝ հոգեկան առողջության խնդիրների հետ կապված՝ «չափավոր արտահայտված նևրաստենիա» ախտորոշմամբ:

«Ազատության» հետ զրույցում Արծրուն Հովհաննիսյանը հայտնել է, որ Տիգրան Խաչատրյանը բանակից տարկետում է ստացել ռազմաբժշկական հանձնաժողովի որոշմամբ, բայց թե ինչ ախտորոշմամբ, ինքը տեղյակ չէ, ուստի որևէ լրատվամիջոցի չէր կարող հայտնել, թե ինչ ախտորոշմամբ է տարկետում ստացել Տիգրան Խաչատրյանը:

Նախկինում ռազմաբժշկական հանձնաժողովը Տիգրան Խաչատրյանի մոտ ախտորոշել է «չափավոր արտահայտված նևրաստենիա» և զինվորական ծառայությունը կրելու 3 տարով տարկետում տրամադրել։
 
Տիգրան Խաչատրյանը կասկածվում է ՀՀ քրեական օրենսգրքի 112-րդ հոդվածի առաջին մասով նախատեսված արարքի համար, այն է` Հարություն Զաքարյանին ծանր մարմնական վնաս պատճառելու մեջ և կալանքի տակ է գտնվում հուլիսի 27-ից: