Պերմյակովի գործով դատական նիստը Երևանում բաց կլինի

ԵՐԵՎԱՆ, 5 օգոստոսի – Sputnik. Հայաստանում ռուսական ռազմակայանի` դասալքության և զենքի հափշտակման համար մեղադրվող զինծառայող Վալերի Պերմյակովի քրեական գործով բաց նիստը նշանակված է օգոստոսի 12–ին, ՌԻԱ Նովոստիին է հայտնել Հյուսիս–Կովկասյան շրջանային զինվորական դատարանի մամուլի քարտուղար Ալյոնա Կատկալոն։

Հյուսիս–Կովկասյան շրջանային զինվորական դատարանին ենթակա Ռուսական հինգերորդ կայազորային զինվորական դատարանի նիստերն ընթանում են Երևանում։

Կատկալոն նշել է, որ դատավորը երկարացրել է նաև Պերմյակովի կալանքի ժամկետը մինչև 2016 թվականի հունվարի 30–ը։

Գյումրիում, որտեղ տեղակայված է 102–րդ ռուսական ռազմակայանը, հունվարի 12–ին սպանվել էր Ավետիսյանների ընտանիքը` չորս մեծահասակներն ու երկու երեխաները։

Հանցագործության կատարման համար մեղադրվում է ռուս ժամկետային զինծառայող Վալերի Պերմյակովը։ Նա ձերբակալվել է և խոստովանել մեղքը, հետաքննությունը վարում էին ռուս և հայ իրավապահները։

Հունիսի վերջին Հայաստանի նախագահ Սերժ Սարգսյանի և ՌԴ տրանսպորտի նախարար, հայ–ռուսական միջկառավարական հանձնաժողովի համանախագահ Մաքսիմ Սոկոլովի կայացած հանդիպման արդյունքներով հայտարարվել է, որ Գյումրու սպանության գործով քննությունը և դատաքննությունը կվարեն հայկական մարմիններն ու ատյանները։

«Դասալքություն», «Զենքի հափշտակում» և «Զենքի անօրինական կրումը» մնացած հոդվածներով նյութերն օգոստոսի սկզբին ուղղվել են Հայաստանում հինգերորդ կայազորային զինվորական դատարան։