ՌՈՒԵ ղեկավարը շնորհավորել է հայ կաթոլիկների նոր առաջնորդին

ԵՐԵՎԱՆ, 5 օգոստոսի  – Sputnik. Մոսկվայի և Համայն Ռուսիո պատրիարք Նորին Սրբություն Կիրիլը շնորհավորել է Տանն Կիլիկիո Կաթողիկե Հայոց Կաթողիկոս Պատրիարք Տեր Գրիգոր Պետրոս Կապրոյանին Հայոց 20-րդ Կաթողիկոս Պատրիարքի գահակալության կապակցությամբ։

«Ցավոք, անցյալի դասերը մինչև վերջ չեն յուրացվել, և մենք տեսնում ենք, թե ինչպես է այսօր Մերձավոր Արևելքում կրկին բռնության ալիք բարձրացել, որը սպառնում է ոչնչացնել քրիստոնեության հետքերն այն հողի վրա, որտեղից այն տարածվել է ողջ աշխարհով»,– նշված է Ռուս ուղղափառ եկեղեցու առաջնորդի` Մոսկվայի պատրիարքարանի պաշտոնական կայքում հրապարակված ուղերձում։

«Բազմաթիվ ահաբեկություններում, դաժանություններում և ավերածություններում մարմնավորված այդ սպառնալիքին դեմհանդիման` քրիստոնյաները պետք է ջերմեռանդ աղոթեն խաղաղության վերականգնման համար և ջանքերը միավորեն նեղության մեջ գտնվող եղբայրներին օգնելու համար»,– ավելացրել է նա։

Պատրիարքը հիշեցրել է, որ ոչ այդքան վաղուց այդ մասին զրուցել է արդեն հանգուցյալ, նախկին Կաթողիկոս–Պատրիարք Ներսես Պետրոս 19–րդի հետ, և հույս է հայտնել, որ նրա աշխատանքը կշարունակի Հայ կաթոլիկ եկեղեցու նոր ղեկավարը։

Նորին սրբություն Գրիգոր Կապրոյանը` Սուրբ խաչի թեմի եպիսկոպոսը Փարիզում, ընտրվել է Կիլիկիո հայ նոր պատրիարք Հայ կաթոլիկ եկեղեցու Հայրապետական սինոդի ժամանակ Բզոմարում (Լիբանան)։