ԵՐԵՎԱՆ, 5 օգոստոսի – Sputnik. Երևանի էկոլոգիան տուժում է քաղաքաշինական սխալների ու կանաչ գոտիների սահմանափակ լինելու պատճառով, չորեքշաբթի լրագրողներին հայտնեց «Հանուն մարդկային կայուն զարգացման» ասոցիացիայի նախագահ, բնապահպան Կարինե Դանիելյանը։
«Երբ Հայաստանն անկախություն ձեռք բերեց, սկսվեց շինարարություն` առանց սեյսմիկ վտանգները հաշվի առնելու, իսկ կանաչ գոտիները, հատկապես Երևանի կենտրոնում, սկսեցին կամաց–կամաց վերանալ», – նշեց Դանիելյանը։
Ասոցիացիայի նախագահի խոսքով` բնապահպանության տեսանկյունից ամենախոցելին մայրաքաղաքի կենտրոնն է, որը գերհագեցած է բազմահարկ բնակելի համալիրներով։
«Միայն մայրաքաղաքի կենտրոնի տարածքները կանաչապատելով` կարելի է շտկել իրավիճակը», – համոզված է փորձագետը։
Բնապահպանը նաև նշեց, որ այսօր Երևանն առավել քան խոցելի է անձրևների պատճառով, քանի որ ջրահեռացման համար ծառայում են Հրազդան և Գետառ գետերը, որոնք կառուցապատված են տարբեր շինություններով։
«Կանայք հանուն առողջության և առողջ շրջակա միջավայրի» կազմակերպության փոխնախագահ Լիլիկ Սիմոնյանն իր հերթին նույնպես հաստատեց, որ մայրաքաղաքում գետնաջրերի մակարդակը զգալի բարձրացել է և կարող է վնասել քաղաքային ենթակառուցվածքները։
Միաժամանակ, բնապահպանները դրական են գնահատել Երևանի կենտրոնում կառուցապատման նոր հայեցակարգի մշակումը, որին հավանություն է տվել Հայաստանի կառավարությունը, և որը մոտ ապագայում կներկայացվի Հայաստանի ԱԺ քննարկմանը։
Երևանի բնապահպանությունը տուժում է քաղաքաշինական սխալների ու կանաչ գոտիների պակասի պատճառով
19:13 05.08.2015 (Թարմացված է: 19:21 05.08.2015)
© Sputnik / Владимир Федоренко
/ Բաժանորդագրվել
Երևանում բնապահպանման իրավիճակը կարելի է բարելավել միայն ավելացնելով կանաչ գոտիները, կարծում է բնապահպան Կարինե Դանիելյանը
