Արաբագետ. Թուրքիան կսահմանափակվի ավիահարվածներով

ԵՐԵՎԱՆ, 5 օգոստոսի – Sputnik. Թուրք–ամերիկյան համատեղ ռազմական գործողությունները Սիրիայում կսահմանափակվեն ավիահարվածներով, «Sputnik Արմենիա» տեղեկատվական պորտալին ասաց արաբագետ Սարգիս Գրիգորյանը։

Օգոստոսի 5-ին Թուրքիայի ԱԳՆ ղեկավարի պաշտոնակատար Մևլութ Չավուշօղլուն հայտարարել է, որ պատրաստվում են ԱՄՆ–ի աջակցությամբ ռազմական լայնածավալ գործողություններ սկսել Սիրիայում, որն ուղղված կլինի «Իսլամական Պետություն» (ԻՊ) խմբավորման դեմ։

«Ես կարծում եմ, որ ամեն ինչ կսահմանափակվի օդային հարձակմամբ, ցամաքային գործողություններ չեն լինի։ Նույն հարվածները ԻՊ–ի և քրդերի դեմ, սակայն ավելի ինտենսիվ կերպով», – ասաց Գրիգորյանը։

Նրա խոսքով` ամերիկացիների մասնակցությունը գործողություններին Թուրքիային կզսպի Սիրիայում քրդերի նկատմամբ հարվածներից, քանի որ այդ մասին Վաշինգտոնն արդեն հանդես է եկել հայտարարությամբ։

«Համատեղ պայքարի նպատակ Իսլամական պետությունն է, իսկ դրա դեմ շատ արդյունավետ գործում են քրդերը։ Այդ պատճառով որոշակի շեշտադրումներ կարվեն, որոնք ուղղված կլինեն Անկարայի դեմ` քրդերի նկատմամբ նմանատիպ գործողություններ թույլ չտալու համար», – նշեց Գրիգորյանը։

Ընդ որում, նա նշեց, որ Անկարան շարունակում է գաղտնի ավիահարվածներ հասցնել քրդական միավորումների դեմ, դրանք մեկնաբանելով որպես ՔԱԿ–ի (Քրդստանի աշխատավորական կուսակցություն) դեմ ուղղված հարվածներ, ինչպես Սիրիայում, այնպես էլ Իրաքում, սակայն պարզ է, որ դա այդպես չէ։

Ավելի վաղ ԱՄՆ–ն և Թուրքիան համաձայնության են եկել Թուրքիայի Ինջիրլիկ ՌՕՈՒ կայանն օգտագործելու մասին։ Այնտեղ կարող են տեղակայվել ԻՊ–ի դեմ նաև կոալիցիայի այլ երկրների թռչող սարքավորումները։ Սակայն ինքնաթիռների թույլատրման որոշումը կընդունվի ամեն անգամ առանձին և Անկարայի ու Վաշինգտոնի հետ համատեղ։

ԱՄՆ–ն երկար ժամանակ պայքարում էր Ինջիրլիկ կայանը օգտագործելու թույլտվությունը ստանալու համար, քանի որ այդ կայանը մարտավարական առավելություններ է տալիս ԻՊ–ի նկատմամբ հարձակումներ կատարելու համար։