«Գռոզնիի ծովի» ափին երեքշաբթի բացվել են առանձին կանանց և տղամարդկանց լողափեր, որոնց միջև ընկած հեռավորությունը երկու կիլոմետր է և դրանց միջև տեղադրված է երկու մետրանոց ցանկապատ, որը կանանց հուսալիորեն պաշտպանում է տղամարդկանց հետաքրքրասեր հայացքներից։ Երկու լողափերը միավորում է միայն ընդհանուր անունը` «Լագունա» հանգստյան գոտի։
Ավելի քան 2,5 հազար քառակուսի մետր մակերես ունեցող լողափում կան լողափնյա թախտեր, հովանոցներ, ցնցուղ ընդունելու համար նախատեսված խցիկներ, փոքրիկ ռեստորաններ, արևելյան ոճի փոքրիկ տաղավարներ, լողափնյա պարագաների խանութ, բժշկական կետ։
Տղամարդկանց կթողնեն կանանց լողափ, միայն եթե նրանք 12 տարեկանից ցածր են և մայրիկների ուղեկցությամբ։
Խեղդվողներին փրկության կգան հատուկ դասընթացներ անցած կանայք, ՌԻԱ Նովոստիին տեղեկացրել է հանգստյան գոտու ներկայացուցիչը։
«Գռոզնիի ծով» տուրիստական համալիրի ներդրումային նախագիծը Չեչնիայում ամենախոշորն է «Վեդուչի» լեռնադահուկային հանգստավայրից հետո։ Նախագծի իրականացումը սկսվել է երեք տարի առաջ, և միայն երկու տարի ծախսվել է ջրամբարի հատակի մաքրման համար։
Ժողովրդի շրջանում «Գռոզնիի ծով» անունով տարածված ջրամբարի ափին նախատեսվում է կառուցել մի քանի հյուրանոցներ, լողացող ռեստորան, մարզա–առողջարանական կենտրոն, դելֆինարիում։ Գլխավոր զարդը պետք է դառնա բացառիկ գունային–երաժշտական շատրվանը։
Չեչենուհիները հիջաբներով լողում են Չեչնիայում հատուկ կանանց համար բացված առաջին լողափում
© Ruptly
Բաժանորդագրվել
Շուրջ հարյուր մուսուլմանուհիներ մասնակցել են Չեչնիայում հատուկ կանանց համար նախատեսված առաջին լողափի բացմանը։ Լողափը գտնվում է «Գռոզնիի ծովի» ափին։ Դիտեք տեսանյութում, թե ինչպես են չեչենուհիները հանգստանում և լողանում տղամարդկանց համար արգելված տարածքում։
