Մարդասիրական հարցերի ենթախումբը քննարկել է պատանդների խնդիրը

ԵՐԵՎԱՆ, 3 օգոստոսի – Sputnik. Ուկրաինայի իրավիճակի կարգավորման շփման խմբի մարդասիրական հարցերի ենթախումբը Մինսկում քննարկել է հսկիչ անցակետերի աշխատանքը, վերաբնակիչների և պատանդների խնդիրները, հայտնել է ենթախմբում Կիևի ներկայացուցիչ Իրինա Գերաշչենկոն։

«Մարդասիրական ենթախմբում առանցքային էին երեք թեմաներ` հսկիչ անցակետերի աշխատանքը, վերաբնակիչների և պատանդների խնդիրները։ Մենք դրել էինք այն հարցը, որ եվրոպական դեսպանությունների ներկայացուցիչներին թույլ չեն տալիս ներկա լինել Նադյա Սավչենկոյի դատավարությանը, և կարծիք հայտնել, որ շփման եռակողմ խումբը պետք է հարցադրի գերեվարված ուկրաինացիների նկատմամբ փակ դատավարությունների անթույլատրելիությունը, և ինչպես եվրոպացի դիվանագետների, այնպես էլ միջազգային առաքելությունների, մասնավորապես, ԵԱՀԿ–ի և ԿԽՄԿ–ի ներկայացուցիչներին թողնելու հարցը»,– գրել է Գերաշչենկոն Facebook–ի իր էջում, հաղորդում է Sputnik-Բելառուսը։

Ըստ նրա, հնչեցվել է նաև բուֆերային գոտու հումանիտար վիճակի հարցը։ Գերաշչենկոն շեշտել է, որ մշտական գնդակոծությունների պայմաններում ապրող բնակիչները միշտ չէ, որ սննդամթերք և բժշկական օգնություն են ստանում։
«Կարծում ենք, որ մարդասիրական օգնության հարցն այդ գյուղերում առանցքային է, և դրան պետք է միանան մարդասիրական կազմակերպությունները, այդ թվում` նրանք, որոնք օգնում են օկուպացված տարածքներին։ Առաջարկեցինք, որ բուֆերային գոտու բնակավայրերի իրավիճակի թեման առաջնահերթ դառնա հաջորդ հանդիպումներում»,– հայտնեց Գերաշչենկոն։

Ինչ վերաբերում է վերաբնակիչների հարցին, ապա Գերաշչենկոն նշել է, որ այդ խնդրի հետագա քննարկմանը պետք է մասնակցեն նաև վերաբնակիչների կազմակերպությունների լիազոր ներկայացուցիչները։ «Ես հանդես կգամ այդպիսի նախաձեռնությամբ։ Չէ՞ որ հենց նրանք են կորցրել տներ, գույք, փոքր հայրենիքը և երազում են այնտեղ վերադառնալ»,– պարզաբանել է Գերաշչենկոն։

Նա նաև հիշեցրել է, որ հաջորդ հանդիպմանը պայմանավորվածություն է ձեռք բերվել ուկրաինական կողմին Դոնբասի` Կիևի կողմից չվերահսկվող հատվածում պատիժ կրող դատապարտյալներին ուկրաինական կողմին փոխանցելու վերաբերյալ։ «Այստեղ աշխատանք է տարվում, և այժմ ճշտվում են ցուցակները և փոխանցման ընթացակարգը, մենք ուզում ենք դրան ներգրավել նաև ԿԽՄԿ–ն։ Այստեղ, հուսով եմ` արագ ժամկետներում կոնկրետ արդյունքներ կլինեն»,– ասել է Գերաշչենկոն։

Ինչպես ավելի վաղ հայտնել էր Sputnik–ը, եռակողմ խմբի նիստին մասնակցում են Ուկրաինայի նախկին նախագահ Լեոնիդ Կուչման, ԴԺՀ և ԼԺՀ լիազոր ներկայացուցիչները, ԵԱՀԿ ներկայացուցիչ Մարտին Սայդիկը և Ռուսաստանի ներկայացուցիչ Ազամատ Կուլմուհամետովը։ Եռակողմ խմբի նիստի սկիզբը ծրագրված էր 16։00–ին, բայց ուշացավ գրեթե մեկ ժամով։

Շփման խմբի նախորդ նիստի գլխավոր արդյունքն այն էր, որ կողմերը համաձայնագիր ստորագրեցին 100 միլիմետրից պակաս տրամաչափի սպառազինությունն ու տանկերը բաժանարար գծից հետ տանելու մասին:  Համաձայնագրի տեքստն արժանացել է Շփման խմբի անվտանգության ենթախմբի նիստի հավանությանը հուլիսի 21–ին, սակայն ինքը` շփման խումբը, այն այդպես էլ չի նախավավերացրել։