Նալչիկում ՀԳ ռեժիմը չեղյալ է հայտարարվել, ոչնչացվել են վեց գրոհայիններ

ԵՐԵՎԱՆ, 3 օգոստոսի– Sputnik. Երկուշաբթի գիշերը Նալչիկի տարածքում սահմանված հակաահաբեկչական գործողության (ՀԳ) ռեժիմը չեղյալ է հայտարարվել գրոհայիններից 6–հոգանոց խմբի չեզոքացումից հետո, ՌԻԱ Նովոստիին հաղորդել է Կաբարդինո Բալկարիայի օպերատիվ շտաբը։

Ավելի վաղ Ազգային հակաահաբեկչական կոմիտեն (ԱՀԿ) հաստատել էր Նալչիկում հատուկ գործողության ընթացքում վեց գրոհայինների ոչնչացումը։

«Ռուսաստանի Անվտանգության դաշնային ծառայության Կաբարդինո Բալկարիայի հարցերով վարչության պետի հրամանով Մոսկվայի ժամանակով 10։30–ից ՀԳ ռեժիմը և նշված տարածքում գործող ժամանակային սահմանափակումները չեղյալ են հայտարարվել»,– ասվում է հաղորդագրությունում։

ՀԳ ռեժիմը սահմանվել էր գիշերը Նալչիկի տարածքում` Սամոտեչնայա, Գելյաևի, Մուսովի, 2–րդ Նարեչնայա, Նարտանովսկայա և Կալինինա փողոցների հատվածում։ Մուսովի փողոցի շենքի բնակարանում պաշարման մեջ էր գրոհայինների խումբ, որը հանձնվելու առաջարկին ի պատասխան կրակ էր բացել ուժայինների ուղղությամբ։

Հակաահաբեկչական գործողության իրավական ռեժիմը ենթադրում է մի շարք միջոցներ, այդ թվում` հասարակական կարգի պահպանության ուժեղացում, նշված տեղանքում գտնվող մարդկանց փաստաթղթերի ստուգում, իսկ անհրաժեշտ փաստաթղթերի բացակայության դեպքում` նրանց ուղեկցում ոստիկանության բաժիններ կամ այլ կոմպետենտ մարմիններ, տարածքից տրանսպարոտային միջոցների հեռացում, բջջային կապի արգելափակման հնարավորություն։