ԶԼՄ. Հնարավոր է Գերմանիայի Բունդեսթագի պատգամավորներն այցելեն Ղրիմ

ԵՐԵՎԱՆ, 3 օգոստոսի– Sputnik. Գերմանիայի Բունդեսթագի պատգամավորները ֆրանսիացի գործընկերների` Ղրիմ կատարած այցելության ֆոնին դիտարկում են թերակղզի այցելելու հնարավորությունը, «Իզվեստիա»–ին հայտարարել է «Ձախեր» գերմանական կուսակցության պատգամավոր Ալեքսանդր Նոյը։

«Ճիշտ եմ համարում ֆրանսիացի պատգամավորների` Ղրիմ կատարած այցելությունը։ Որպես ժողովրդի կողմից ընտրված պատգամավորներ` նրանք պետք է ներկայացնեին և պատմեին Ֆրանսիայի պաշտոնական իշխանություններին, քաղաքական գործիչներին, ինչպես նաև հանրությանն այն մասին, թե ինչ է այնտեղ իրականում տեղի ունենում։ Սա ճիշտ և ցուցադրական որոշում է։ Գերմանիայի ձախակողմյան կուսակցության` քաղաքականության նկատմամբ հայացքը տարբերվում է Բունդեսթագի մյուս կուսակցությունների հայացքներից, այդ պատճառով Ղրիմ այցելելու հնարավորությունը մեզ համար ավելի ընդունելի է», – ասել է նա հրատարակությանը։

ՌԴ Դաշնության խորհրդի միջազգային գործերի կոմիտեի փոխնախագահ Անդրեյ Կլիմովը «Իզվեստիյա» թերթին տեղեկացրել է, որ Ղրիմ թերակղզի եվրոպացի պատգամավորների կողմից այցելելու հնարավորությունը կարող է քննարկվել սեպտեմբերի 15–19–ը Մոնղոլիայում կայանալիք ԵԱՀԿ Խորհրդարանական վեհաժողովի հերթական նստաշրջանի ժամանակ։

Ավելի վաղ տեղեկացվում էր, որ ֆրանսիացի գործընկերներից հետո Ղրիմ են պատրաստվում այցելել մի խումբ իտալացի պատգամավորներ, որոնք ներկայացնում են «Հինգ աստղ» կուսակցությունը, «Հյուսիսի լիգա» իտալական կուսակցությունը ներկայացնող սենատորն ու մի շարք այլ եվրոպացի քաղաքական գործիչներ։

2014 թ.–ի մարտին անցկացված հանրաքվեից հետո Ղրիմը կրկին դարձել է ռուսական շրջան։ Այդ պահին ուկրաինական ինքնավար շրջանի բնակիչների ճնշող մեծամասնությունը, որը չի ճանաչել Ուկրաինայում 2014 թ.–ի փետրվարին տեղի ունեցած պետական հեղաշրջման օրինականությունը, կողմ քվեարկեց ՌԴ –ի կազմում ներառվելուն։ Մոսկվայում ընդգծում են, որ Ղրիմում հանրաքվեի անցկացումը համապատասխանում է միջազգային իրավունքի նորմերին և ՄԱԿ–ի Կանոնադրությանը։