ԶԼՄ. Ծովինարի ճամբարում խտացրած կաթից ու կիլկիից թունավորված երեխաներին հրամայել են չխոսել

ԵՐԵՎԱՆ, օգոստոսի 3– Sputnik. Գեղարքունիքի մարզի Ծովինար գյուղում ԵԿՄ ամառային ճամբարից թունավորման ախտանիշներով Մարտունու հիվանդանոց տեղափոխված 20 և ավելի երեխաները թունավորվել են խտացրած կաթից և կիլկիից, հաղորդում է HayNews.am–ը:

Երբ երեխաներին տեղափոխել են հիվանդանոց, նրանք բժիշկներին պատմել են, որ կերել են կիլկի ու խտացրած կաթ և դրանից հետո են սկսել իրենց վատ զգալ, սակայն ճամբարի պատասխանատուները երեխաներին հրամայել են չխոսել ու չպատասխանել ոչ մեկի հարցին:

Սննդամթերքի անվտանգության պետական ծառայությունը հայտարարությամբ էր հանդես եկել, որ ծառայության տեսուչներն ահազանգը ստանալուց հետո անմիջապես այցելել են ճամբար, վերցրել են սննդամթերքի հետ շփվող մակերեսներից լվացուկներ, առկա սննդամթերքից՝ հիմնականում պահածոյացված, ինչպես նաև ճամբարում օգտագործվող ջրից կատարվել է նմուշառում և տրվել լաբորատոր փորձաքննության։ Արդյունքերի մասին ՍԱՊԾ–ից խոստացել են լրացուցիչ հայտնել:

Ավելի վաղ հայտվնել էր ԵԿՄ ամառային ճամբարից թունավորման ախտանիշներով Մարտունու հիվանդանոց տեղափոխված 20 և ավելի երեխաներից միայն մեկն է հոսպիտալացվել, HayNews.am կայքի թղթակցի հետ զրույցում ասել էր Գեղարքունիքի մարզպետարանի առողջապահության վարչության պետ Անուշ Պողոսյանը:

«Փառք Աստծո, ոչ մի լուրջ բան չկար, բոլոր երեխաներն առաջին բուժօգնություն են ստացել ու տուն գնացել: Միայն մի երեխայի ենք հոսպիտալացրել, որի վիճակը միջին ծանրության է: Առաջիկա ժամերին նա էլ դուրս կգրվի»,- հավելել էր Պողոսյանը:

Այն հարցին՝ ինչն էր եղել թունավորման պատճառը, Անուշ Պողոսյանն ասել էր, որ չի կարող այդ հարցին պատասխանել.«Այդ գործով զբաղվում են համապատասխան մարմինները՝ Սննդի անվտանգության տեսչությունը, Սանէպիդկայանը, որոնք, կարծում եմ, համպատասխան ստուգումներ անցկացնելուց հետո հայտարարությամբ հանդես կգան»,-ասել էր Գեղարքունիքի մարզպետարանի առողջապահության վարչության պետը՝ ավելացնելով միայն՝ չի բացառում, որ թունավորման պատճառ կարող է լինել նաև արևահարումը:

HayNews.am-ի թղթակիցը փորձել էր կապ հաստատել Մարտունու բժշկական կենտրոնի ինֆեկցիոն բաժանմունքի վարիչ Մանուկ Երիցյանի հետ՝ հիվանդանոցում գտնվող երեխայի վիճակի մասին ինֆորմացիա ստանալու, սակայն նրա հեռախոսին պատասխանել էր բուժքույրը՝ նշելով, որ բժիշկն այս պահին խիստ զբաղված է։

Կայքի թղթակիցը զանգահարել էր նաև Մարտունու բժշկական կենտրոն, որտեղից նրան հայտնել էին, որ երեխան արդեն լավ էր զգում իրեն և դուրս է գրվել: «Բաժանմունքում այլևս թունավորման ախտանշաններով տեղափոխված երեխա չունենք»,-ասել էին հիվանդանոցից:

Երեխաները հանգստանում էին Մարտունու Ծովինար գյուղում գործող ամառային ճամբարում, որը պատկանում է Երկրապահ կամավորականների միությանը: