Էրդողանն իր մտահոգության միակ պատճառը համարում է իսլամը

ԵՐԵՎԱՆ, 31 հուլիսի – Sputnik. Թուրքիայի նախագահ Ռեջեպ Թայիփ Էրդողանն Ինդոնեզիա կատարած այցի ժամանակ հայտնել է, որ իր միակ մտահոգությունն իսլամն է։ Նա «Իսլամական պետություն» (ԻՊ) ահաբեկչական կազմակերպությանը մեղադրել է կրոնը վարկաբեկելու մեջ, հայտնում է ՌԻԱ Նովոստին։

«Մենք միայն մի մտահոգություն ունենք։ Այն է` իսլամը, իսլամն ու կրկին անգամ իսլամը։ Այդ պատճառով մեզ համար անհնար է ընդունել այն, ինչը ստվեր է գցում իսլամի վրա։ ԻՊ–ն վնաս է հասցնում միայն, այդ կազմակերպության գործունեությունն անհամատեղելի է իսլամի հետ։ Մենք բոլորս պետք է վճռականություն ցուցաբերենք ահաբեկչությունը ժխտելու և դրա դեմ պայքարելու հարցում` անկախ դրա հիմքերից», – Hurriyet թերթը ներկայացնում է Էրդողանի խոսքը։

Թուրք առաջնորդը հերքել է իր քաղաքական հակառակորդների մեղադրանքները և հայտարարել, որ «Թուրքիան երբեք չի ներգրավվել այդ գործընթացում»։
Էրդողանը նշել է, որ Թուրքիան ավելի քան 6 մլրդ դոլար է ծախսել Սիրիայի փախստականներին ընդունելու համար։ Նա քննադատել է արևմուտքին փախստականներին աջակցելու հարցում մասնակցություն չունենալու համար։

«Նրանք (եվրոպական երկրները – խմբ.) փախստականներին Էգեյան և Միջերկրական ծովերում խորտակվելու հնարավորություն են տալիս միայն», – ընդգծել է Թուրքիայի նախագահը։

Թուրքիայում իրավիճակը կտրուկ սրվել է հուլիսի 20-ից Սիրիային սահմանակից Սուրուչում ԻՊ–ի կազմակերպած ահաբեկությունից և հարավ–արևելքում ոստիկանների սպանություններից հետո, որոնց պատասխանատվությունն իր վրա է վերցրել Թուրքիայում արգելված Քրդստանի աշխատավորական կուսակցությունը։

Թուրքիայի զինված ուժերը գրոհել են ԻՊ–ի դիրքերը Սիրիայի հյուսիսում և ՔԱԿ–ի դիրքերը` Իրաքի հյուսիսում։ Հարվածները հասցվել են F-16 կործանիչներից, ինչպես նաև Թուրքիայի սահմանակից տարածքում տեղակայված տանկերից և հրետանուց։ Ի պատասխան դրան ՔԱԿ–ն իր կայքում հայտնել է, որ Անկարայի հետ հաշտությունը «կորցրել է իմաստը»։