Քրդագետ Թուրքիային մոտ ապագայում քրդական անջատողականությունը չի սպառնում

ԵՐԵՎԱՆ, հուլիսի 30– Sputnik. Մոտ ապագայում Թուրքիային քրդական անջատողականությունը չի սպառնում, չնայած հեռանկարային բոլոր կայսրություններն էլ վաղ թե ուշ փլուզվելու են, «Sputnik-Արմենիա» ռադիոկայանի հետ զրույցում ասել է ԵՊՀ  հայագիտական հետազոտությունների ինստիտուտի Հայ-քրդական հարաբերությունների բաժնի վարիչ, միջազգային հարաբերությունների ֆակուլտետի դոցենտ Վահրամ Պետրոսյանը:

Նրա խոսքով, Թուրքիայի քրդաբնակ հատվածի անջատողականության հաջողությունը քիչ հավանական է: Նա նշել է, որ անջատողական գործընթացները խորացել են Հյուսիսային Իրաքում, Սիրիայում, և Թուրքիան հասկանում է, որ այդ շթղան վաղ թե ուշ կարող է հասնել նաև Թուրքիա: «Հետևաբար՝ այս գործընթացը հանգեցրել է նրան, որ թուրքերը ձգտում են կանխել դա: Հեռանկարում Իրաքյան Քուրդիստանում պետության ստեղծումը կարող է լուրջ սպառնալիք լինել, և Թուրքիան փորձում է կանխել այդ զարգացումները»,- թուրք-քրդական պարզաբանել է Պետրոսյանը: 

Թուրքիան հայտարարում է պայքար «Իսլամական պետություն» խմբավորման դեմ և զուգահեռաբար ռմբակոծում է Հյուսիսային Իրաքում տեղակայված Քրդական աշխատավորական կուսակցության դիրքերի ուղղությամբ: Ըստ քրդագետի,  թուրքական կողմի նպատակն է թուլացնել երկուսին էլ՝ միմյանց դեմ պատերազմի միջոցով, այնուհետև ստեղծել անվտանգության գոտի՝ տվյալ տարածքների վրա հսկողություն սահմանելով:

Ինչ վերաբերում է Թուրքիայի կողմից «Իսլամական պետության» աջակցությանը, ապա Վահրամ Պետրոսյանն ընդգծում է, որ դա հնարավոր չէ հաստատապես պնդել, որ Թուրքիան  «Իսլամական պետության» բացառիկ հովանավորությունն է ստանձնել: «Այն, որ աջակցում է որոշակիորեն՝ բուժման նպատակով և այլն, կան անհերքելի փաստեր: Բացի այդ, Թուրքիան «Իսլամական պետություն»-ը դիտարկում է որպես «չարյաց փոքրագույն»: Թուրքիայում հաճախ են ասում, որ եթե «Իսլամական պետությունը», հիվանդության տեսանկյունից, ընդամենը հարբուխ է, ապա քրդական հիվանդությունը՝ ուռուցք»,- ասել է քրդագետը:

Վահրամ Պետրոսյանն ընդգծել է, որ թուրքական կառավարությունն ի դեմս՝ «Արդարություն և զարգացում» կուսակցության, հայտվել է փակուղում: Արտաքին քաղաքական դաշտում, մասնավորապես՝ Սիրիայում, թուրքական սցենարները ձախողվել են, իսկ ներքաղաքական դաշտում ձախողվել է միանձնյա կառավարություն ձևավորելու ձգտումը:

«Հունիսի ընտրություններից հետո  «Արդարություն և զարգացում» կուսակցությունը հայտնվեց փակուղում: Ստանալով 258 մանդատ և միայնակ կառավարություն ձևավորելու համար չունենալով ընդամենը 3-4 տոկոս, նրանք չկարողացան հասնել իրենց ցանկությանը»,- նշել է  ԵՊՀ միջազգային հարաբերությունների ֆակուլտետի դոցենտը: