ՄՕԿ–ի ղեկավար. նոր նախագահի ընտրությամբ ՖԻՖԱ–ի խնդիրները չեն լուծվի

ԵՐԵՎԱՆ, 30 հուլիսի  – Sputnik. Ֆուտբոլի միջազգային ֆեդերացիայի (ՖԻՖԱ) խնդիրները նոր նախագահի ընտրությամբ չեն լուծվի, ՖԻՖԱ–ին արմատական բարեփոխումներ են անհրաժեշտ, կարծում է Միջազգային օլիմպիական կոմիտեի ղեկավար Թոմաս Բախը։

ՈՒԵՖԱ–ի ղեկավար Միշել Պլատինին չորեքշաբթի պաշտոնապես հայտարարել է ՖԻՖԱ–ի նախագահի պաշտոնում իր թեկնածության առաջադրման մասին։ Ընտրությունները կանցկացվեն 2016 թվականի փետրվարի 26–ին Ցյուրիխում, նշում է  Р-Спорт–ը։

Ավելի վաղ թեկնածություններ առաջադրելու իրենց մտադրության մասին հայտարարել են ֆրանսիացի հայտնի նախկին ֆուտբոլիստ Դավիդ Ժինոլան, Հորդանանի արքայազն Ալի բին Ալ Հուսեյնը, Մոսկվայի ԲԿՄԱ նախկին գլխավոր մարզիչ բրազիլացի Զիկոն, Լիբերիայի ֆուտբոլային ասոցիացիայի նախագահ Մուսա Բիլիթին։ Հինգշաբթի ՖԻՖԱ–ի նախագահի ընտրություններում իր թեկնածությունն առաջադրելու մասին հայտարարել են ՖԻՖԱ–ի նախկին նախագահ և Կորեայի ֆուտբոլային ասոցիացիայի նախկին ղեկավար, հարավկորեացի Չոն Մոնջունը։

Բախի կարծիքով` ՖԻՖԱ–ի նախագահի պաշտոնի բոլոր թեկնածուները պետք է «կանգնեն թափանցիկության ուղու վրա»։ «Դա վերաբերում է ցանկացած թեկնածուի։ Մասնավորապես այն պատճառով, որովհետև ՖԻՖԱ–ի խնդիրները չեն լուծվի նոր նախագահի ընտրությամբ։ Պետք է բարեփոխումներ անցկացվեն ՖԻՖԱ–ի կառուցվածքում, թափանցիկությունն անհրաժեշտ է բարձրացնել, որոշ կառույցներ` բարեփոխել։ Բավարար չէ միայն նախագահի ընտրություններ անցկացնելը»,– ասել է Բախը, ում խոսքն է մեջբերում Ֆրանս Պրեսը։

1998 թվականից ՖԻՖԱ–ն գլխավորող Յոզեֆ Բլատերը մայիսի 29–ին հինգերորդ անգամ վերընտրվել է կոռուպցիոն սկանդալի ֆոնին, բայց արդեն հունիսի 2–ին հայտարարել է պաշտոնից հեռանալու մասին և խնդրել ՖԻՖԱ–ի գործադիր կոմիտեին` հրավիրել արտահերթ կոնգրես կազմակերպության հաջորդ ղեկավարին ընտրելու համար։ Այն ժամանակ Բախը հայտնել էր, որ խորը հարգանքով վերաբերվեց Բլատերի` պաշտոնը լքելու որոշմանը։

Մայիսի վերջին հայտնի էր դարձել, որ Ցյուրիխում կոռուպցիայի կասկածանքով ձերբակալվել են ՖԻՖԱ–ի մի քանի բարձրաստիճան պաշտոնյաներ, այդ թվում` Ջեֆրի Ուեբը, Էուխենիո Ֆիգերեդոն, Էդուարդե Լին, Հուլիո Ռոկան, Կոստաս Տակասը, Ռաֆայել Էսքիվելը, Խոսե Մարիա Մարինը։ Եվս մի քանի պաշտոնյաների մեղադրանքներ են առաջադրվել։ Նրանց թվում են` Հյուսիսային և Կենտրոնական Ամերիկայի և Կարիբյան ավազանի ֆուտբոլի համադաշնության (ԿՈՆԿԱԿԱՖ) նախկին նախագահ, ոչ վաղ անցյալում ՖԻՖԱ–ի նախկին նախագահ Ջեք Ուորները և Նիկոլաս Լեոսը։