Էներգետիկայի նախարարություն. ահաբեկիչները նավթատար են պայթեցրել Թուրքիայում

ԵՐԵՎԱՆ, 29 հուլիսի – Sputnik. Ջիզրե քաղաքից հինգ կիլոմետր հեռավորության վրա գտնվող Շիրնակ գավառում ահաբեկիչները պայթեցրել են Քիրքուք –Յումուրթալըք նավթատարը, որով երկիր է մտնում իրաքյան նավթը, չորեքշաբթի ասել է  Թուրքիայի էներգետիկայի և բնական պաշարների նախարար Թաներ Յըլդըզը։

«Նախորդ գիշեր Մոսկվայի ժամանակով 01։30–ին Ջիզրե քաղաքից հինգ կիլոմետր հեռավորության վրա գտնվող Շիրնակ գավառում ահաբեկիչները պայթեցրել են Քիրքուք –Յումուրթալըք նավթատարը։ ԱՊ–ից անմիջապես հետո նավթատարն արգելափակվել է։ Օպերատիվ քայլերի շնորհիվ այդ ահաբեկությունը չի դարձել մեր երկրում էներգակիրների պակասի պատճառ»,– ասվում է նախարարի հայտարարությունում, հաղորդում է ՌԻԱ Նովոստին։

Յըլդըզի խոսքով` այս և նախորդ ահաբեկությունները, որոնք կատարվել են Թուրքիայի էներգետիկ օբյեկտներում, ցույց են տալիս, որ ահաբեկիչները փորձում են ապակայունացնել երկրի իրավիճակը։

Երկուշաբթի երկրի արևելքում գտնվող Աղրի գավառում քուրդ գրոհայինները պայթեցրել են գլխավոր գազատարը, որով Թուրքիա է մտնում Իրանի գազը։ Գազամատակարարումն այդ գազատարով մինչ օրս չի վերականգնվել։

Դրությունը Թուրքիայում կտրուկ սրվել է վերջին շաբաթվա ընթացքում Սիրիային սահմանակից Սուրուչում ԻՊ–ի կազմակերպած ահեբակությունից և հարավ–արևելքում ոստիկանների սպանություններից հետո, որոնց պատասխանատվությունն իր վրա վերցրել Թուրքիայում արգելված Քրդստանի աշխատավորական կուսակցությունը։

Թուրքիայի զինված ուժերը գրոհել են ԻՊ–ի դիրքերը Սիրիայի հյուսիսում և ՔԱԿ–ի դիրքերը` Իրաքի հյուսիսում։ Հարվածները հասցվել են F-16 կործանիչներից, ինչպես նաև Թուրքիայի սահմանակից տարածքում տեղակայված տանկերից և հրետանուց։ Ի պատասխան դրան ՔԱԿ–ն իր կայքում հայտնել է, որ Անկարայի հետ հաշտությունը «կորցրել է իմաստը»։