Երևանի Հանրապետության հրապարակում ակտիվիստները նստացույց սկսեցին

ԵՐԵՎԱՆ, 27 հուլիսի — Sputnik Էլեկտրաէներգիայի թանկացման դեմ բողոքի ակցիայի մասնակիցները Հանրապետության հրապարակի հարակից  այգում եռօրյա նստացույց սկսեցին, հայտնում է Sputnik–ի թղթակիցը։

Նստացույցին ներկա պահին մասնակցում է 10-15 մարդ։

Ավելի վաղ Երևանի փոխոստիկանապետ Վալերի Օսիպյանը ցուցարարներին առաջարկել էր նստացույցը անցկացնել կամ շատրվանների մոտ կամ այգու  հակառակ հատվածում։ Նա նաև նշել է, որ ակցիայի մասնակիցները կարող են իրենց ավտոմեքենաները կայանել հրապարակի մոտ։

Նրա խոսքերով, ոստիկանությունը շարունակում է խոչընդոտել ցուցարարների տեղաշարժին հրապարակի կենտրոնական հատված։

Բողոքի ակցիայի մասնակիցներից մեկը, «Ոտքի՛ Հայաստան» քաղաքացիական նախաձեռնության մասնակից Դավիթ Սանասարյանը նշել է, որ ցուցարարները կշարունակեն մնալ հրապարակում, խոչընդոտելով քաղաքացիների ազատ տեղաշարժմանը, որպեսզի ոստիկանությունը իրենց թույլ տա անցնել հրապարակի կենտրոնական հատված, ինչպես և որոշվել էր։

«Մենք ծանոթացել ենք բոլոր իրավական նորմերին, որի համաձայն ակցիայի անցկացումն անօրինական չէ, այնուամենայնիվ, ոստիկանությունը շարունակում է պնդել իր դիրքորոշումը, և թույլ չի տալիս մեզ անցնել կենտրոնական հատված։ Մենք քննարկում կանցկացնենք և կշարունակենք տեղեկացնել հանրությանը ցույցի մասին, ես համոզված եմ, որ շուտով մեր շարքերը կավելանան նոր մարդկանցով», – նշել է Սանասարյանը։

«Ոտքի՛, Հայաստան» շարժումը «Ո՛չ թալանին» քաղաքացիական նախաձեռնության այլընտրանքն է։  «Ո՛չ թալանին» նախաձեռնությունը Հայաստանում էլեկտրաէներգիայի թանկացման դեմ բողոքի ակցիայի ակունքներում էր կանգնած, որի մասնակիցները հունիսի կեսերից  երեք շաբաթ շարունակ օր ու գիշեր փակել էին Երևանի Բաղրամյան պողոտան։