ԵՐԵՎԱՆ, 25 հուլիսի – Sputnik. Եվրամիության հետ Հայաստանի հարաբերությունները դիտարկելիս պետք է զերծ մնալ Ադրբեջանի հետ համեմատության մեջ մտնելուց, Sputnik-Արմենիա ռադիոկայանի եթերում ասել է ԱԺ պատգամավոր Թևան Պողոսյանը, անդրադառնալով Դոնալս Տուսկի տարածաշրջան կատարած այցին ու դրա հետևանքներին:
Ըստ նրա` չպետք է տպավորություն ձևավորվի, թե Հայաստանը և Ադրբեջանը երկվորյակ են, չպետք է հավասարության նշան դնել։
«Հայաստանն ու Եվրամիությունը կշարունակեն իրենց բանակցությունները, և ես հուսով եմ, որ 2015 թ-ի ընթացքում նոր իրավական համաձայնագրի ստորագրման հնարավորություն կստեղծվի, քանի որ Հայաստան-ԵՄ իրավական այն համաձայնագիրը, որը մենք ունենք, ստորագրվել է 1999 թ-ին և թույլ չի տալիս Հայաստանին ներգրավվել բազմաթիվ այլ ծրագրերի մեջ` հաշվի առնելով այն ժամանակվա սահմանափակումները: Բոլոր այն ֆինանսական գործիքները, որոնցով ԵՄ-ն կարողանում է տարբեր ծրագրեր իրականացնել այստեղ, չեն համապատասխանում անգամ այդ համաձայնագրի նշված հնարավորություններին», — ասել է նա:
Նա նշեց, որ նույն Եվրամիության հետ բանակցությունների ժամանակ բազմիցս է պատահել այնպես, որ բոլոր հարցերը, բանակցված տեքստերն ու հնարավորությունները հասանելի էին միայն պետական մի քանի ներկա գտնվող մարմիններին, իսկ բնակչության համար դրանք մնում էին անհասկանալի, կյանքի համար փոփոխություններն էլ` անտեսանելի:
«Դրա համար այստեղ մենք պետք է հասկանանաք, թե ինչ նկատի ունենք Հայաստան-ԵՄ ինտեգրում ասելիս: Հայաստան ասելով ի՞նչ ենք հասկանում. արդյոք դա ամբողջ Հայաստանի հանրապետության բնակիչնե՞րն են, թե՞ միայն ԵՄ և Հայաստանի պետական մարմինների ինտեգրման հարցն է: Իշխանությունները պետք է առաջինը մանրամասն ներկայացնեն և զեկուցեն այդ բարեփոխումների մասին` թե ուր են դրանք տանում և ինչի համար են», — նշել է Պողոսյանը:
Ըստ նրա` ինչ վերաբերում է Դոնալդ Տուսկի այցելությանը, ապա դրա շրջանակներում եվրոպացի պաշտոնյան հերթական անգամ հնչեցրեց այն մոտեցումը, ըստ որի` ղարաբաղյան խնդրի կարգավորումը միայն խաղաղ ճանապարհով է իրատեսական:
Պատասխանելով հարցին, թե արդյոք Տուսկի այցն ինչ-որ բան փոխե՞ց Ադրբեջանի համար, Աժ պատգամավորը հիշեցրեց նաև մի կարևոր կետ:
Ըստ նրա` այն, որ Տուսկ-Ալիև մամուլի ասուլիսին եվրոպացի բարձրաստիճան պաշտոնյան նշել էր, որ ինքը բարձրաձայնել է քաղբանտարկյալների հարցերը և մարդկանց ազատ արձակման խնդիր բարձրացրել` շեշտելով, որ այդ խնդիրները շատ արագ լուծում կստանան, նշանակում է, որ Ադրբեջանն իրենց տեսանկյունից բարդ ու տհաճ բանակցություններ է ունեցել:
«Թերևս, շատ կոշտ խոսակցություն է եղել, և հուսով եմ, որ ապագայում մենք գործնականում կտեսնենք Եվրամիության կողմից արձագանքները», — հավելեց Թևան Պողոսյանը։
