Տրանսպորտի նախարարություն. Հայաստանը ներդրողներ է փնտրում Իրանի հետ երկաթգծի նախագծի համար

ԵՐԵՎԱՆ, 23 հուլիսի – Sputnik. Հայաստանի իշխանությունները զբաղված են Իրանի հետ երկաթգծի ծրագրի իրականացումը սկսելու համար ներդրողներ փնտրելով, ասաց լրագրողներին ՀՀ տրանսպորտի և կապի նախարարի առաջին տեղակալ Արթուր Առաքելյանը։

Հայաստանի նախագահ Սերժ Սարգսյանը հուլիսի 9-ին ելույթ ունենալով Ուֆայում ԲՌԻԿՍ և ՇՀԿ համատեղ գագաթնաժողովին, հայտնել է, որ հայ–իրանական երկաթգծի կառուցումը թույլ կտա ԵՏՄ երկրներին Պարսից ծոցով դուրս գալ Հնդկական օվկիանոս։

«Ներկա պահին մենք բանակցություններ ենք վարում, փորձում ենք լուծել ֆինանսական հարցերը։ Կան շահագրգիռ կողմեր, որոնք պատրաստ են ֆինանսավորել ծրագրի մի մասը, սակայն դրա արժեքը բավականին բարձր է, և մենք պետք է խնդրի համալիր լուծում գտնենք», –հինգշաբթի կառավարության նիստից հետո լրագրողներին ասաց Առաքելյանը ։

Նրա խոսքերով, ծրագրի իրականացման ժամկետները դեռ պարզ չեն, այդ հարցը կհստակեցվի ֆինանսավորման խնդիրները լուծելուց հետո։

ՀՀ կառավարությունը 2014 թ.–ի օգոստոսի 7–ին հավանություն է տվել Իրան–Հայաստան երկաթուղու շինարարության նախնական ծրագրին։

Նախագծի արժեքը գնահատվում է 3,5 մլրդ դոլար։ Երկաթուղու երկարությունը կկազմի 300 կիլոմետր։ Երկաթուղու ենթակառուցվածքում կներառվեն 19,4 կիլոմետր երկարությամբ 64 կամուրջներ, 102,3 կիլոմետր երկարության 60 թունելներ և 27 կայաններ։

Սպասվում էր, որ շինարարությունը կավարտվի 2022 թ.–ին, բեռնափոխադրումների ծավալը կկազմի տարեկան 25 միլիոն տոննա։

Երկաթուղու նախագիծը մշակել է Չինաստանի շինարարության և հաղորդակցությունների միջազգային ընկերությունը (CCCC International)։ Նախագծով հետաքրքրվում են չինական բանկերը, որոնք պատրաստակամություն են հայտնել ֆինանսավորել ծրագրի 60 տոկոսը։