ԵՐԵՎԱՆ, հուլիսի 22– Sputnik. Ucom հայկական ընկերությունը մտադիր է ձեռք բերել «Orange Արմենիա» ընկերության (France Telecom–ի 100–տոկոսանոց դուստրը) բաժնետոմսերի 100 տոկոսը, չորեքշաբթի հաղորդում է telecom.arka.am կայքը։
Ինչպես լրագրողներին է հայտնել «Orange Արմենիա» ընկերության գլխավոր տնօրեն Ֆրանսիս Ժելիտբերը, ներկա պահին Ucom ընկերության հետ բանակցություններ են ընթանում։
«Վաճառքի մասին որոշումը կապված չէ ֆինանսական խնդիրների հետ, այլ պայմանավորված է մեր բաժանորդներին կոնվերգենտ ծառայություններ, այդ թվում` ֆիքսված կապի և հեռուստատեսության ծառայություններ տրամադրելու ցանկությամբ»,– ասել է նա։
Ժելիտբերը հայտարարել է, որ «Orange Արմենիան» կմնա որպես բջջային օպերատոր, կպահպանի արտոնագրերը և ենթակառուցվածքը, ընկերության 500 աշխատողները կշարունակեն իրենց գործունեությունը, ծառայություններ կտրամադրվեն 650 հազար գործող և նոր բաժանորդներին։
Orange Armenia–ն France Telecom (ապրանքանիշը` Orange) ընկերության 100 տոկոսանոց դուստր ընկերությունն է, որը հայկական շուկա է մտել 2009թ.–ի նոյեմբերի 5–ին։ Այն ապահովում է ցանցի 83 տոկոսանոց ծածկույթ և բջջային ցանցի և ինտերնետ հասանելիություն հանրապետության 600 համայնքներում (քաղաքներում և գյուղերում)։
Ucom (Universal Communications) ընկերությունը հիմնադրվել է 2007 թ.–ին և զբաղվում է հեռահաղորդակցական ծառայությունների տրամադրմամբ։ Ericsson–ի աջակցությամբ ընկերությունը ստեղծել է լայնաշերտ հասանելիության ցանց` տրամադրելով ինտերնետային, IP հեռուստատեսության և ֆիքսված հեռախոսակապի ծառայություններ։
Ucom-ը մտադիր է գնել «Orange Արմենիա» ընկերության բաժնետոմսերի 100%–ը
14:45 22.07.2015 (Թարմացված է: 14:46 22.07.2015)
© АРКА
Բաժանորդագրվել
««Orange Արմենիան» կմնա որպես բջջային օպերատոր, կպահպանի արտոնագրերը և ենթակառուցվածքը, ծառայություններ կտրամադրվեն 650 հազար բաժանորդներին
