ԶԼՄ. Պուտինի նկատմամբ ունեցած հարգանքի պատճառով Դեպարդյեն «սպառնալիք» է դարձել Ուկրաինայի համար

ԵՐԵՎԱՆ, հուլիսի 21– Sputnik. Ուկրաինայի մշակույթի նախարարությունը դերասան Ժերար Դեպարդյեի անունն ընդգրկել է  այն անձանց «սև ցուցակում», ովքեր գործող իշխանությունների կարծիքով` սպառնում են երկրի ազգային անվտանգությանը, գրում է ՌԻԱ Նովոստին` հղում անելով Ouest-France ֆրանսիական հրատարակությանը։

Նշվում է, որ ուկրաինական ԶԼՄ–ներին կարգելվի նշել դերասանի անունը, իսկ Դեպարդյեի մասնակցությամբ ֆիլմերը չեն հեռարձակվի երկրի հեռուստատեսությամբ և կինոթատրոններում։

Հոդվածի հեղինակի կարծիքով` արգելքի պատճառը դերասանի արտահայտություններ են։ Մասնավորապես, 2014թ.–ի օգոստոսին Ռիգայի կինոփառատոնում Դեպարդյեն հայտարարել էր, որ «սիրում է Ռուսաստանը և Ուկրաինան, որը Ռուսաստանի մաս է»։ Բացի այդ, ուկրաինական իշխանությունները հաշվի են առել նաև այն, որ դերասանը բազմիցս աջակցություն է հայտնել ՌԴ նախագահ Վլադիմիր Պուտինին։

Հրատարակությունը բացատրում է, որ Ուկրաինայի մշակույթի նախարարությունը մշակույթի գործիչների ցուցակ է կազմել, որում ընդգրկվել են այն անձինք, ովքեր չափազանց մոտ են ՌԴ կառավարությանը։ Այդ մարդկանց մասին կարգելվի հիշատակել ԶԼՄ–ներում, ինչպես նաև եթերից կհանվեն նրանց երգերն ու ֆիլմերը։

2012թ.–ի վերջից Դեպարդյեն` վրդովված Ֆրանսիայի կառավարության «հարուստների համար հարկերը» մինչև 75 տոկոս ավելացնելու պլաններից, հայտարարել է ֆրանսիական քաղաքացիությունից հրաժարվելու մտադրության մասին։ Այդ ժամանակ նա տուն է գնել Նեշեն վայրում` Բելգիայի հարավ–արևմուտքում գտնվող ֆրանսալեզու Էստեմպյուի համայնքում։ Մեկ տարի առաջ դերասանը ստացել է ռուսական անձնագիր, սակայն պահպանել է ֆրանսիական քաղաքացիությունը։ Ավելի ուշ Դեպարդյեն ստացել է նաև մշտական գրանցում Մորդովիայի Սարանսկ մայրաքաղաքում։ Արդյունքում հայտնի է դարձել ևս յոթ երկրների քաղաքացիություն ստանալու նրա մտադրության մասին։ Նրա խոսքով` որքան շատ անձնագրեր ունենա, այնքան շատ երկրներ կարող է այցելել առանց վիզայի։