Սիմոնյանը «երկու ձեռքով» կողմ է ՖԻՖԱ–ի նախագահի ընտրություններում Պլատինիի թեկնածությանը

ԵՐԵՎԱՆ, 20 հուլիսի – Sputnik.  Ռուսաստանի ֆուտբոլի միության նախագահի պաշտոնակատար Նիկիտա Սիմոնյանը «Р-Спорт» գործակալությանը հայտնել է, որ ամբողջովին կողմ է Միշել Պլատինիի թեկնածությանը ՖԻՖԱ–ի նոր նախագահի ընտրություններում։

ՖԻՖԱ–ի գործադիր կոմիտեն երկուշաբթի Ցյուրիխում անցկացված արտահերթ նիստում սահմանել է, որ կոնգրեսը, որի ժամանակ կկայանան կազմակերպության ղեկավարի ընտրությունները, կանցկացվի 2016 թվականի փետրվարի 26–ին Ցյուրիխում։ Ավելի վաղ ԶԼՄ–ները հայտնել էին, որ ՈՒԵՖԱ–ի ղեկավար Միշել Պլատինին նույնպես պատրաստվում է առաջադրել իր թեկնածությունը։ Երկուշաբթի ՖԻՖԱ–ի ներկայիս ղեկավար Յոզեֆ Բլատերը հաջողություն է մաղթել Պլատինիին ընտրություններում։

«Պլատինին առավել պատրաստված ֆիգուր է, չենք խոսում արդեն նրա հանրաճանաչ լինելու մասին։ Հորդանանցի արքայազնի նկատմամբ ունեցած ողջ հարգանքով հանդերձ` ասեմ, մի՞թե նա Պլատինիին մրցակից է։ Իհարկե` ոչ։ Բլատերից հետո, ում ես շատ եմ հարգում, ես երկու ձեռքով կողմ եմ Պլատինիին։ Պլատինին ֆուտբոլում հասել է ամեն ինչի։ Իսկ այն, ինչպես է նա ղեկավարում ՈՒԵՖԱ–ն, խոսում է նրա կշռի մասին։ Կարծում եմ, որ Ռուսաստանը, անշուշտ, կսատարի Պլատինիին։ Դա արդեն պետք է հարցնել Վիտալի Լեոնտևիչին (Մուտկո, ՖԻՖԱ գործադիր կոմիտեի անդամ և ՌՖՄ նախագահի թեկնածու), բայց կարծում եմ, որ նա էլ Պլատինիին կողմ կլինի։ Իսկ այնտեղ էլ թեկնածություններ չկան»,– ասել է Սիմոնյանը հեռախոսով։

Ավելի վաղ ՖԻՖԱ–ի ղեկավարի պաշտոնի քվեարկությանն իրենց թեկնածությունները ներկայացնելու մասին էին հայտնել ֆրանսիացի նախկին ֆուտբոլիստ Դավիդ Ժինոլան, Հորդանանի արքայազն Ալի բին Ալ Հուսեյնը, ՖԻՖԱ–ի նախկին փոխնախագահ և Կորեայի ֆուտբոլի ասոցիացիայի նախկին ղեկավար Չոն Մոնջունը, ԲԿՄԱ նախկին ավագ մարզիչ, բրազիլացի Զիկոն, Լիբերիայի ֆուտոբլի ասոցիացիայի նախագահ Մուսա Բիլիթին։