Բժիշկները հարյուրամյա կնոջը հայտնել են հղիության մասին

ԵՐԵՎԱՆ, 20 հուլիսի – Sputnik. Ֆերհեմ քաղաքի բնակիչ, հարյուրամյա բրիտանուհի Դորիս Էյլինգը նամակ է ստացել քաղաքային հիվանդանոցից, որն իրազեկում է կնոջը հղիության մասին։ Ծեր կնոջը հայտնել են տվյալ դեպքում հետազոտման գնալու և ցուցված անալիզները հանձնելու անհրաժեշտության մասին։ Այդ մասին գրում է Lenta.ru–ն` հղում անելով The Sun–ին։

Ինչպես պարբերականին պատմել է Էյլինգը, նամակն ընթերցելուց հետո միանգամից հասկացել է, որ մի բան այն չէ, չնայած, որ նրա անունն ու ծննդյան ամսաթիվը գինեկոլոգները ճիշտ էին նշել։

«Ես երեք երեխա և քսան թոռ ունեմ, բայց հղի չեմ եղել արդեն մոտ 70 տարի։ Ես 100 տարեկան եմ, ինչպե՞ս կարող եմ հղիանալ»,– նշել է կինը։

Կապվելով հիվանդանոցի հետ` Էյլինգը և նրա բարեկամները պարզել են, որ թյուրիմացություն է տեղի ունեցել։ Տարեց կնոջը և նրա ընտանիքից ներողամտություն են հայցել «այն անհանգստության համար, որ պատճառել է նամակը»։

Ինչպես պատմել է կնոջ 76–ամյա որդին, իր մայրն ուզածի պես ծիծաղել է, երբ թյուրիմացությունը հարթվել է։

Գինեսի ռեկորդների գրքի համաձայն, բնական ճանապարհով հղիացած և երեխա ծննդաբերած ամենատարեց կինն աշխարհում 59–ամյա բրիտանուհի Դոն Բրուքն է։ Նա հղիացել է 1997 թվականին, ընդունելով բժիշկի նշանակած էստրոգեն պարունակող դեղորայք (ոչ հղիանալու նպատակով)։

ԱՄԲ–ի օգնությամբ աշխարհի ամենատարեց ծննդկանն իսպանուհի Մարիա դել Կարմեն Բուսադա դե Լարան է, ով 2006 թվականին 66 տարեկան հասակում երկվորյակներ է ունեցել։ Կինն օգտվել է դոնորական սերմնահեղուկի բանկից։ Նա մահացել է 2009 թվականին` ծննդաբերությունից հետո զարգացած ստամոքսի քաղցկեղից։